Михаил Ефимович өрөспүүбүлүкэни салайан олорбут эпохатын, бэлиитикэ хонуутугар буолбут сүрүн кэрчиктэри, дойдубут устуоруйатын ахтан ааста. Пуорумҥа мустубут ыччакка бэлитиичэскэй карьераны оҥосторго үлэҕэ, дьон иннигэр, сиэр-майгы өттүнэн эппиэтинэстээх буоларга сүбэлээтэ.
СӨ Бырабыыталыстыбатын бэрэссэдээтэлэ Георгий Степанов 1990-ус сылларга оскуоланы бүтэрбит ыччат учуутал, быраас, агроном, экэнэмиис буоларын, атын идэ туһунан ыраламматын даҕаны аҕынна. Ол кэмҥэ Михаил Николаев каадырдары бэлэмниир департамены арыйан, Арассыыйа, Сибиир, Уһук Илин киин куораттарын үрдүк үөрэҕин кыһаларыгар аныгы кэм ирдэбилигэр эппиэттиир идэлэргэ саха ыччатын үөрэттэрбит үтүө өҥөтүн билиһиннэрдэ. Эдэр ыччаты үөрэхтии сатаан өрөспүүбүлүкэҕэ английскай тылы судаарыстыбаннай тылынан биллэрэ сылдьыбытын бар дьон соһуйа истибитин кэпсээтэ.
Михаил Ефимович реформатор быһыытынан, дьону сөхтөрөр сонун идиэйэлэри таһаарар идэлээҕэ. Атын дойдулары кэрийэ сылдьан, дьон хайдах олорорун көрөрө, уопут атастаһара.
Георгий Степанов урут дьон биэнсийэтин Буочтаттан ыларын, ону биир сиргэ түмэн, Сахабыт Сиригэр пенсионнай сулууспа хайдах тэриллибитин, ол уопуту Арассыыйа атын эрэгийиэннэрэ кэлин холобур оҥостубуттарын туһунан иһитиннэрдэ. Михаил Ефимович итинник кэскиллээх саҕалааһыннара, ыллыктаах бачыымнара федеральнай таһымҥа олоххо киирбиттэрин холобурдаата. Пуорум кыттааччыларыгар туохтан да толлубакка харса суох ыйытан, саҥаны билэн-көрөн иһэллэригэр баҕарда.
Хаҥалас улууһун баһылыга Сергей Гребнев Сахабыт Сирин Бастакы Бэрэсидьиэнэ Михаил Николаев биир дойдулаахтара буоларынан киэн тутталларын, ону таһынан пуорум тиэмэтэ: туризмы, тыа хаһаайыстыбатын сайыннарыы, саҥа бырайыактары олоххо киллэрэргэ үбү-харчыны булуу муниципалитеттарга ордук чугаһын биллэрдэ.
Василий Кононов хаартыскаҕа түһэриилэрэ.
-
0
-
0
-
0
-
0
-
0
-
0
