«Инникини түстүүр идиэйэлэр» III Николаевскай пуорум панельнай сиэссийэтигэр аһаҕас микрофоҥҥа эдэр дьон өрөспүүбүлүкэ салалтатыгар долгутар ыйытыктарын биэрдилэр.
Ленскай куораттан Алена Петриченко, «АЛРОСА» хампаанньа сүрүннүүр инженера эдэр ыччаты олохсутарга, кинилэри удамыр сыаналаах дьиэнэн-уотунан хааччыйарга өрөспүүбүлүкэ бырабыыталыстыбата туох үлэни ыытарын сураста.
СӨ Бырабыыталыстыбатын бэрэссэдээтэлин солбуйааччыта Георгий Степанов ыраах сытар улуустары быраастарынан, учууталларынан хааччыйыы боппуруоһа олус сытыытык турарын бэлиэтээтэ.
Урут Сэбиэскэй Сойуус саҕана үөрэхтэрин саҥа бүтэрбит эдэр дьонтон ыйыта барбакка эн ити улууска, эн ол нэһилиэккэ бараҕын диэн быһаарар хамыыһыйа үлэлиирэ. Кинилэр каадыр ханна тиийбэтин көрөн, аттаран туруораллара. Эдэр үлэһиттэр сирбэккэ-талбакка уопсайга, служебнай дьиэҕэ, сорохтор ыалга кыбыллан олороллоро. Билигин оннук суох, балык ханна дириҥин, ыччат ханна усулуобуйа үчүгэйин көрдүүр.
Үлэһит тиийбэтин быһаарар сыалтан «Земскэй учуутал”, “Земскэй быраас, биэлсэр”, «Култуура земскэй үлэһитэ» федеральнай бырагыраамалар оҥоһуллубуттара. Ити бырагыраама таһынан, сорох улуустар эбии төлөбүр оҥороллор. Холобур, земскэйинэн быраастар 2 мөл. солк. ылаллар, онуоха Ньурба улууһа 1 мөл. солк. эбэр. Онон эдэр киһи дьиэлэнэригэр уу харчынан 3 мөл. ылар, ону таһынан, Уһук Илиҥҥи ипэтиэкэҕэ баара-суоҕа 2% төлүүр. Маннык чэпчэтиилээх ипэтиэкэҕэ бырамыысыланнас, чуолаан «АЛРОСА» үлэһиттэрэ эмиэ киирэллэр.
Онон билиҥҥи ыччат дьиэлэнэригэр, үлэлииригэр, дьиэ кэргэнин тэринэригэр хаһааҥҥытааҕар даҕаны үчүгэй усулуобуйа тэриллэн турар, бастакы оҕо күн сирин көрдө даҕаны ийэ хапытаала, кэлиҥҥи оҕолорго сир учаастага бэриллэр.
Ити курдук Николаевскай пуорум үс күннээх үлэтин тухары ыччат күннээҕи кыһалҕаларын, муниципалитеттарга киирэр инвестицияны хайдах булуохха сөбүн, туризмы сайыннарыы, тыа хаһаайыстыбатын саҥа көлүөнэ үлэһиттэрин иитэн таһаарыы боппуруостарын дьүүллэстилэр.
Василий Кононов хаартыскаҕа түһэриитэ.
-
0
-
0
-
0
-
0
-
0
-
0
