Ил Түмэн Бэрэссэдээтэлин солбуйааччы -- Ил Түмэн бүддьүөккэ, үпкэ, түһээн уонна сыана бэлиитикэтигэр, бас билии уонна приватизация боппуруостаргар сис кэмитиэтин бэрэссэдээтэлэ Юрий Николаев эрэгийиэннээҕи сокуон баазатын оҥорорго федеральнай сокуону учуоттуур наадалааҕын тоһоҕолоото. Өрөспүүбүлүкэ баайын-дуолун, ол иһигэр күндү металл уонна күндү таас судаарыстыбаннай пуондатын салайыыга Ил Дархаҥҥа ураты болҕомто ууруллар.
– Биһиги судаарыстыба ресурсаларын туһунан сокуоммутугар күндү металлары атыылааһыны, атыылаһыыны, атастаһыыны хонтуруоллуур хамыыһыйабытыгар боломуочуйаны биэриигэ сыһыаннаах элбэх уларытыылары киллэрдибит. Маннык ыйыылар урут бааллара эрээри, Төрүт Сокуоммутугар официальнайдык киирбэтэхтэрэ, – диэн бэлиэтээтэ Юрий Николаев.
Конституционнай Сэбиэт бэрэссэдээтэлин солбуйааччы Алексей Ефимов уларытыылар сыалларын-соруктарын сиһилии быһаарда. Кини этэринэн, икки сүрүн уларытыы олохтоох салайыныы уорганнарын тутулугар уонна боломуочуйаларын толоруу бэрээдэгэр сыһыаннаах. Олохтоох салайыныы тутулугар улахан уларыйыылар былааннамматтарын бэлиэтиир наадалаах. Бу баар быраабылалары саҥа федеральнай ирдэбиллэргэ техническэй өттүнэн сөп түбэһиннэрии эрэ. Алексей Ефимов уларытыылар билиҥҥи сокуоннарга баар кэһиилэри уонна дьүөрэлэспэт өрүттэри туоратарга киирэллэрин чуолкайдаан эттэ. «Бу уларытыы сыыһа быһаарыылары, алҕастары суох оҥоруоҕа уонна сокуоннай процедуралар чуолкай, аһаҕас буолалларын хааччыйыаҕа», – диэн эбэн эттэ.
Юрий Николаев уонна Алексей Ефимов уларытыылары аһаҕас истиилэргэ дьүүллэһии улахан суолталааҕын бэлиэтээтилэр. Бу тэрээһин былааннаммыт уларыйыылар сыалларын-соруктарын уонна содулларын туһунан чуолкай өйдөбүлү дьоҥҥо-сэргэҕэ биэриэ диэн эрэллээхтэрин биллэрдилэр.
Саха сирин олохтоохторун сокуоннай интэриэстэрин көмүскүүр саҥа көннөрүүлэри нэһилиэнньэни кытта сүбэлэһэн баран бигэргэтиигэ үлэни Ил Түмэн салгыы ыытар былааннаах. Бу туһунан Ил Түмэн пресс-сулууспата суруйар.
Хаартыска: Ил Түмэн саайтыттан.
-
0
-
0
-
0
-
0
-
0
-
0
