Тэрээһин “Үрүҥ хаар алгыһа” норуоттар икки ардыларынааҕы поэзия бэстибээлин чэрчитинэн ыытылынна. “Хабыландыы Баатыр” тылбааһын источнигын быһыытынан нууччалыыттан икки барыйаанын ылан туһаммыттар. “Хабыландыы Баатыр” – 10 тыһ. тахса строкалаах эпическай поэма. Манна Хабыландыы талаанньыттары утары хорсун быһыыта кэпсэнэр.
Бырабыыталыстыба бэрэссэдээтэлин солбуйааччы Сергей Местников “Хабыландыы Баатыр” казах эпоһын сахалыы тылбаастааһын улахан суолталааҕын, тоҕо диэтэххэ хас биирдии норуот эпоһа айар үлэ, саҥа айымньылар, ускуустуба источнигынан буоларын бэлиэтээтэ. Инньэ диэн туран, кини бу саҥа кинигэ аан дойду норуоттарын эпостарын уонна култуураны сайыннарыыга төһүү буолуо диэн эрэнэрин эттэ.
Биһирэмҥэ Ил Түмэн Бэрэссэдээтэлин бастакы солбуйааччы Александр Жирков кытынна. Кини көҕүлээһининэн эпостары сахалыы тылбаастааһын анал сериянан тахсар буолбута.
М.К. Аммосов аатынан ХИФУ Арассыыйа Хотугулуу-илиҥҥи норуоттарын уонна култуураларын институтун дириэктэрэ, тыл билимин хандьыдаата, бу эпоһы тылбаастааһыҥҥа кыттыспыт Гаврил Торотоев “Александр Николаевич миэхэ бу казах норуотун эпоһын сахалыы тылбаастыырга кыттыс диэн этии киллэрбитэ. Онуоха улаханнык толкуйдуу барбакка, төһө да уустук уонна эппиэтинэстээх үлэ күүтэрин биллэрбин, тута сөбүлэспитим. 5724 поэтическай строкаттан турар эпоһы балтараа сылтан уһуннук тылбаастаатым. Хас биирдии тылбаасчыт уус-уран айымньыны тылбаастыырыгар бэйэтэ ураты ньымалаах, сыһыаннаах, стратегиялаах уонна тактикалаах буолар. Биир бэйэм казах эпоһын ис хоһоонун төһө кыалларынан толорутук тиэрдэргэ уонна ааҕааччыга уус-уран эстетическай дьайыытын хаалларарга кыһалынным. Ол да иһин оригиналга ордук чугаһата сатаатым, ол эрээри итиннэ биир “ноолоох”. Бэйэбэр поэтическай строка ритмическай тутулугар сыһыаннаан тылбаас көҥүлүн туһанным”, -- диэтэ.
Санатар буоллахха, 2014 сылтан ыла, “Аан дойду норуоттарын эпическэй пааматынньыга” серияҕа сахалыы тылынан киргиистэр “Манастара”, алтаайдар “Маадай Харалара”, башкирдар “Ураал Баатырдара” уонна тувиннар “Кунан Харалара” тылбаастанна.
Хаартыска: Василий Кононов, Ил Түмэн пресс-сулууспата.
-
0
-
0
-
0
-
0
-
0
-
0
