Уопсастыба

Бастакытынан, өрөспүүбүлүкэ 290-7 №-дээх быраап аакталарын туһунан сокуонун барылыгар уларытыылары киллэрии туһунан кини билиһиннэрдэ.

«Бу сокуон барыла өр оҥоһулунна, оробуочай бөлөх састаабыгар норуот дьокутааттара, СӨ Урбаанын министиэристибэтин, Ил Дархан дьаһалтатын үлэһиттэрэ, урбаанньыттар, итиэннэ кинилэр бырааптарын көмүскүүр боломуочуйалаах бэрэстэбиитэл киирэн үлэлээтилэр. Сокуон барылын тула, быраап аакталарыгар дьайыыга араас санаа этилиннэ.

Ил Дархан ыйааҕа 2023 с. баттаммыт, ол ситэриилээх былаас уорганнара бэлэмниир сокуоннарын барылыгар эрэ сыһыаннаах. Сокуон барыла урбаанньыттара уонна юридическай сирэйдэргэ хайдах дьайыан сөбүй? Бу аналитическай үлэни сокуон барылын бэлэмнээччи оҥоруохтаах. Ону өссө ситэрэн биэриэхпит”, — диэн эттэ Алексей Корнилов.

Иккиһинэн, өрөспүүбүлүкэҕэ итирдэр утах атыытын хааччахтааһын туһунан 298-7 №-дээх сокуонун 2 ыстатыйатыгар уларытыылары киллэрии барылын көрдүлэр. Сокуон барылын тиэкиһин көннөрөргө диэн бу боппуруоһу көрүүнү кэлэр мунньахха көһөрдүлэр. Бырааһынньыктарга, чуолаан ыһыахха, билии, оҕо көмүскэлин. куорат күнүгэр кыраадыстаах утах атыытын боборго оҥоһуллубут сокуон барылын Дьокуускай куорат Дуумата киллэрбит. Уопсастыбаннай аһылык ситимигэр сокуон барыла сыһыана суох. Бу боппуруоһу дьокутааттар икки ардыларынааҕы «Киин куорат» ассоциация уочараттаах мунньаҕар Ил Түмэн уонна Дьокуускай куорат Дууматын дьокутааттара ырытыспыттара.

Үһүс боппуруоһунан туризм хайысхатыгар федеральнай сокуоҥҥа сөп түбэһии суоҕун иһин Борокуруор сокуон барылын утарбытын иһитиннэрдилэр.

Сис кэмитиэт бэрэссэдээтэлэ быһааран биэрбитинэн туризм туһунан сокуоҥҥа кэккэ уларытыылар киириэхтээхтэр. Дьоҕус уонна орто урбаан туһунан сокуон федеральнай сокуону хатылыырын туһунан этилиннэ.

Төрдүс боппуруоһунан Карелия өрөспүүбүлүкэтин сокуону таһаарар уоргана табаар сыанатын суруйуу туһунан РФ Бырабыыталыстыбатын бэрэссэдээтэлин бастакы солбуйааччытыгар Денис Мантуровка иһитиннэрии оҥорбутун көрдүлэр.

Бэһис боппуруоһунан өҥөнү, табаары туһанааччы быраабын көмүскүүр туһунан 101-16-28 №-дээх федеральнай сокуон барылын иһиттилэр.

Норуот дьокутаата Ньургуйаана Заморщикова Судаарыстыбаннай Дуумаҕа көрүллүөхтээх нолуок кодексатыгар киирэр уларыйыылар үгүс урбаанньыттары долгутарын бэлиэтээтэ. НДС боруога кыччыахтаах, онон сис кэмитиэт аатыттан Судаарыстыбаннай Дуумаҕа сурук ыытарга этии киллэрдэ. Кини өрөспүүбүлүкэ бородууксуйаны оҥорботунан сибээстээн, табаар, ас-үөл, туттар тэрил үксэ тастан киирэрин санатан туран, таһаҕаһы тиэйэр урбаанньыттар патеннарыгар болҕомтону уурар наадалааҕын, кэккэ хайысханан ОКВЭД киллэриэххэ сөбүн эттэ.

“Тустаах сокуон барыла Судаарыстыбаннай Дуумаҕа номнуо бастакы ааҕыыны ааспыт, субъектарга сокуону ылынар уорган пленарнай мунньаҕын иһинэн көннөрүүлэри киллэрии болдьоҕо алтынньы 13 күнүгэр бүтэр. Оттон Саха Сиригэр пленарнай мунньах алтынньы 22 күнүгэр буолар”, — диэн быһаарда Алексей Корнилов.

Ол да буоллар, өрөспүүбүлүкэ интэриэһин Судаарыстыбаннай Дуумаҕа көмүскүүр дьокутааттарга уонна урбаан кэмитиэтигэр эрэгийиэн сис кэмитиэтин аатыттан сурук ыытыахха сөбүн эбэн эттэ.

Василий Кононов хаартыскаҕа түһэриитэ.