«Үлэ бэтэрээннэригэр олохтоммут бары чэпчэтиилэр, ханнык эрэгийиэҥҥэ олороллоруттан тутулуга суох, толору көрүллүөхтэрэ. Бу ааты Уһук хоту оройуоннарыгар үлэлээбит ыстаастара 35 сылтан итэҕэһэ суох эр дьоҥҥо, оттон дьахталларга — 30 сылтан итэҕэһэ суох буоллаҕына, наҕараадаларынан ураты өҥөнү бигэргэтэр ирдэбилэ суох иҥэриэххэ наада», — диэн Лантратова чуолкайдаата.
Дьокутаат бэлиэтээбитинэн, билиҥҥи сокуонунан «Үлэ бэтэрээнэ» аат үлэ ыстаастара 20 сылтан итэҕэһэ суох дьахталларга, оттон 25 сылтан итэҕэһэ суох эр дьоҥҥо, ураты үлэҕэ өҥөлөөх буоллахтарына иҥэриллэр. Бу ааты сүгэр дьоҥҥо хас да социальнай өйөбүл миэрэтэ көрүллэр: биэнсийэлэр уонна босуобуйалар, ый аайы төлөнөр харчынан төлөбүрдэр, дьиэнэн хааччыйыы, дьиэ-уот хомунаалынай хаһаайыстыбатын өҥөлөрүгэр төлөбүрдэрин хоромньутун толуйуу, ону таһынан мэдиссиинэ көмөтө, ол иһигэр тиис олордуута. Итини таһынан, сорох эрэгийиэннэргэ эрэгийиэннээҕи таһымнаах үлэ бэтэрээнин аатын иҥэриэххэ сөп. Ол да буоллар, дьокутаат бэлиэтээбитинэн, гражданин РФ атын субъегар көстөҕүнэ, сөптөөх чэпчэтиилэргэ уонна социальнай өйөбүл миэрэлэригэр быраабын сүтэрэр. «Онон, мин ааппар Уһук хоту үлэһиттэрин үлэлэрэ кырдьыга суохтук сыаналанарыттан долгуйбут гражданнартан туруорсуулар куруук киирэллэр», — диэн Яна Лантратова бэлиэтээтэ.
Хаартыска: minvr.gov.ru
