Бастакы бэрэсидьиэммит олоҕо, үлэтэ-хамнаһа барыта Саха Сирин сайдыытыгар, төрөөбүт сахатын норуотун кэскиллээх сарсыҥҥытын туһугар анаммыта. Бастакы бэрэсидиэммит күн сириттэн арахсыбыт кутурҕаннаах күннэригэр, 2023 сыл атырдьах ыйыгар Саха Өрөспүүбүлүкэтин Ил Дархана Айсен Николаев бэлиэтээбитинэн, Михаил Ефимович саҥа Саха Сирин сайыннарыы Стратегиятын өссө ааспыт үйэ 90-с сылларыгар, Сэбиэскэй Сойуус ыһыллыбыт ыарахан кэмигэр төрүттээбитэ. Ол уустук бириэмэҕэ өрөспүүбүлүкэ элбэх хайысхаҕа инники күөҥҥэ тахсыбыта, ол иһигэр киһи хапытаалын, социальнай эйгэни сайыннарыыга, оскуолалары, балыыһалары, успуорт комплекстары тутууга. Олохтоох бырамыысыланнас ыһыллыбакка-тоҕуллубакка оннунан хаалбыта, экэниэмикэ саҥалыы уларыйан, Саха Сирэ дойду кэккэ бөдөҥ эрэгийиэннэрин ахсааннарыгар киирбитэ, “АЛРОСА” АХ тэриллибитэ. Судаарыстыбаннай тутул уларытыллыбыта, саҥа Сүрүн Сокуон (Конституция) ылыныллыбыта, былаас саҥа уорганнара, ол иһигэр бэрэстэбиитэллээх былаас уоргана – Судаарыстыбаннай Мунньах (Ил Түмэн) баар буолбуттара.
«Михаил Ефимович Саха Сирин олохтоохторун олохторо тупсарыгар, норуоппут ахсаана элбииригэр ахсаабат кыһамньытын уурбута. Кини үлэтэ-хамнаһа, санаата-толкуйа бүтүннүү өрөспүүбүлүкэ инникитин түстээһиҥҥэ, оҕону-ыччаты сайыннарыыга түмүллэрэ. Ол курдук, саҥа, аныгылыы оҥоһулаах Мэдиссиинэ киинэ, Саха судаарыстыбаннай үнүбэрсиэтин дьиэлэрэ тутуллубуттара, Муусука Үрдүкү оскуолата, хореографическай учуулусса, цииркэ тутуллубуттара, саҥалыы тэриллибиттэрэ. Михаил Ефимович көҕүлээһининэн аан бастаан «Азия оҕолоро» норуоттар икки ардыларынааҕы успуорт Оонньуулар ыытыллыбыттара.
Кини инники өтө көрөр кыаҕа билигин биһиги элбэх хайысхаларга дойду лиидэрдэрэ буоларбытыгар, эрэллээхтик сананарбытыгар көмөлөһөр, тирэх буолар», – диэн Айсен Николаев бар дьон иннигэр саха саарынын тиһэх суолугар атаарар ыарахан түгэҥҥэ биллэрбитэ.
Хаартыскалар: СИА, Улусмедиа, эрэдээксийэ
-
2
-
0
-
0
-
0
-
0
-
0
