Хаҥалас улууһуттан Ил Түмэн VII ыҥырыытын дьокутаата Тихон Скрябин улуу биир дойдулааҕын үйэтитиигэ ыкса үлэлэһэр, олох үөһүгэр сылдьар киһи. Тихон Николаевич норуот дьокутаатын быһыытынан билигин үйэтитии үлэтин, былааннар туһунан маннык билиһиннэрэр.
- 2023 сыллаахха, Хаҥалас улууһун олохтоохторо күөн туттар, ытык киһибит Михаил Ефимович Николаев төрөөбүт күнүгэр, сэтинньи 13 күнүгэр СӨ Ил Дарханын Бастакы бэрэсидьиэн аатын үйэтитэр туһунан Ыйааҕа тахсыбыта. «Михаил Ефимович личность быһыытынан таһыма баараҕай. Бастакы бэрэсидьиэн Саха Сирин уонна Арассыыйа Федерациятын судаарыстыбаннаһын уонна социальнай-экономическэй сайдыытын түстүүр конституцияларыгар киллэрбит кылаата сүҥкэн. Ыйаах кини нэһилиэстибэтин кэлэр көлүөнэлэргэ анаан үйэтитэргэ төһүү күүһүнэн буолуоҕа», – диэн өрөспүүбүлүкэ баһылыга чопчулаабыта. Ити кэмтэн саҕалаан улуу биир дойдулаахпыт аатын үйэтитиигэ анал хамыыһыйа үлэтин саҕалаабыта.
Ыйаах чэрчитинэн былаан торумнан, үлэ ыытыллар, ол иһигэр Дьокуускайга Михаил Ефимовичка анаммыт пааматынньык туруоҕа. Быйыл концепцията быһаарыллан, 2026 сылга бырайыак олоххо киирэрэ былааннанар. Төрөөбүт дойдутугар Хаҥалас Өктөмүгэр өйдөбүнньүк- мемориал комплекса тутуллара ыйыллыбыта. Итиэннэ, Михаил Николаевы чиэстээн, «Во славу и пользу Республики» бочуоттаах бэлиэ олохтоммута.
Сылын аайы балаҕан ыйын 27 күнүгэр - Саха Сирин судаарыстыбаннаһын күнүгэр, Хаҥалас улууһун Өктөм нэһилиэгэр үөрүүлээх тэрээһин ыытыллара торумнаммыта. Михаил Николаев өрөспүүбүлүкэни салайар кэмигэр олук уурбут бырайыагын салгыы сайыннарарга- Хаҥалас улууһугар научнай чинчийиилэри, аныгы технологиялары бэрэбиэркэлээһини ыытарга «Өлүөнэ кыраайа» научнай-технологическэй кластеры тэрийэр туһунан былаан ылыныллыбыта.
М.Е. Николаев үөрэнээччилэргэ, устудьуоннарга, педагогтарга, култуура уонна ускуустуба диэйэтэллэригэр анаммыт «Билиигинэн кыайыаҥ» истипиэндьийэ судаарыстыбаннай статустанна. Истипиэндийэни сылын аайы, сэтинньи 13 күнүгэр, үөрүүлээх быһыыга-майгыга туттарыы үгэскэ кубулуйда. Биллэрин курдук, урукку сыллартан ыытыллан кэлбит Николаевскай ааҕыылар сыл аайы Өктөмҥө үрдүк таһымнаахтык ыытыллаллар, кэлиҥҥи 3 сылга ис хоһооно байытыллан Бастакы бэрэсидьиэн олоҕугар-үлэтигэр анаммыт хайысха улахан болҕомтону тардар.
«Азия оҕолоро» норуоттар икки ардыларынааҕы успуорт оонньууларын саамай кыра саастаах кыттааччытыгар анаан Бастакы бэрэсидьиэн Кубога олохтонно. Ил Дархан дьаһалыгар олоҕуран уонна Дьокуускай куорат дьаһалтатын уурааҕынан киин куорат Автодорожнай уулуссата М.Е. Николаев аатынан проспект диэн уларытылынна. 2024 сыл балаҕан ыйын 27 күнүгэр Хаҥалас киинигэр Покровскайга М.Е. Николаевка анаммыт пааматынньык туруоруллубута. Москуба чугаһынааҕы «Бэс Чагда» сонотуоруйга кини аата иҥэриллиннэ, РФ Бэрэсидьиэнин иһинэн үлэлиир СӨ Бэрэстэбиитэлистибэтигэр Бастакы бэрэсидьиэн аатынан саала аһылынна. Ону тэҥэ, хамыыһыйа былаанын быһыытынан М.Е. Николаев туһунан “Путь Президента” документальнай киинэ уһуллан, 2024 сыл сэтинньитигэр көрдөрүүгэ тахсыбыта. «Время Николаева», «Я вечно буду благодарен своему народу», «Избранные труды Первого Президента Республики Саха (Якутия) Михаила Ефимовича Николаева», «Продолжение эпоса» кинигэлэр тахсыылара салҕанар.
Хаартыскалар: СИА, Хаҥалас улууһун дьаһалтатын пресс-сулууспата
-
3
-
0
-
0
-
0
-
0
-
0
