Матвей Лыткин бу бырайыагын аан бастаан Кэптэнигэ кэлэн билиһиннэриэҕиттэн, хаалыктаах хаамарга үөрэтиэҕиттэн, күн бүгүнүгэр диэри хаамыы көхтөөхтүк барар. Доруобуйата көммүтүн, тас көстүү, сэбэрэ да ыраас салгынтан тупсубутун, өй-санаа сайдыбытын туһунан этээччи элбэх. Сүүрбэччэ сыллаах хаалыктаах хаамыы бэйэтин үлэтин ити курдук көрдөрдө.
Хаалыктаах далбардар түмсүүлэрин Галина Олесова салайар. Бу күннэргэ түмсүү кыһыҥҥы сезонун аста. Бары биир пуормалаах, значоктаах далбардар аарка аттыгар алгыстаннылар, алаадьынан арчылаатылар. Надежда Лыткина тыынары эрчийэн оһуохайдатан ойутта, ол кэнниттэн Римма Олесова хаалыктаах сэрээккэни оҥортордо. Онтон субуруспутунан уулусса устун хаамтылар.
Түмсүүгэ бары даҕаны бииртэн биир араас дьарыктаах далбардар сылдьаллар. Катерина Говорова чэбдик олох пропагандаһыта. Кыһыны быһа хаалыктаах хаамарын таһынан, саас хайыһардаан дайар, сайын катамаранынан устар. Сөхтөрөрө элбэх.
Мария Алексеева чыычаахтары олус таптыыр, ханна наадатынан көрө сылдьан, кинилэргэ уйа тутар. 75 сааһыгар сылдьар ытык киһи сылайдым-элэйдим диэбэккэ, кыһыҥҥы тымныыга, сайыҥҥы куйааска хаалыктаах хаамыытын бырахпакка сылдьара үөрдэр. Мин тус бэйэм 16-с сылбын хаамабын. Арҕана сөтөл, сүһүөх ыарыыларын «уоскутан», Матвей Лыткиҥҥа махтанабын.
Өр сыллартан нэһилиэгин аһынан-таҥаһынан, норуот күннэтэ туттар табаарынан хааччыйан кэлбит Галина Прокопьева нэһилиэк дьокутаатын итиэннэ түмсүү биир көхтөөх чилиэнин быһыытынан, нэһилиэккэ чөл олох сиэрин тарҕатыыга, көхтөөх уһун үйэлэниигэ үгүс өрүттээх үлэни ыытар. Хаалыктаах далбардар саас уонна күһүн бөһүөлэк тулатын ыраастыыллар, анал сирдээхтэр. Итинэн кинилэр айылҕаны уонна тулалыыр эйгэни харыстааһыҥҥа оҕолорго, ыччаттарга үтүө холобур буолаллар.
Хаартыскалары ааптар ыытта.
-
0
-
1
-
0
-
0
-
0
-
0
