Сийиэскэ өрөспүүбүлүкэ улуустарыттан, Дьокуускай куораттан 458 кэриҥэ дэлэгээт, ону таһынан дойду араас эрэгийиэннэриттэн ыалдьыттар, тыл эспиэрдэрэ кыттыыны ылаллара былааннанар. Ол курдук, «Төрөөбүт тыл уонна төрөөбүт литература бастыҥ учуутала – 2024» Бүтүн Арассыыйатааҕы күрэхтэһии кыайыылааҕа Бүрээт Өрөспүүбүлүкэтиттэн Улан Удэтээҕи национальнай лиссиэй-интэринээт учуутала Светлана Раданжапова, Калмыкия Өрөспүүбүлүкэтиттэн «Төрөөбүт тыл уонна төрөөбүт литература бастыҥ учуутала – 2024» Бүтүн Арассыыйатааҕы күрэх призера, Элиста куорат 24 №-дээх уһуйаанын эбии үөрэхтээһинин педагога Екатерина Балакаева кэлэллэрэ күүтүллэр.
Сийиэс дэлэгээттэрэ саха тылын, литературатын уонна култууратын үүнэр көлүөнэбитигэр, кэлэр кэскилбитигэр тиэрдэр, сайыннарар туһугар этиилэри киллэриэхтэрэ. Сүрүн көтөҕүллэр боппуруостарынан буолуохтара: сахалыы иитии-үөрэтии билимин сайыннарыы, сахалыы тылынан иитэр-үөрэтэр усулуобуйаны үөрэх эйгэтигэр тэрийии, идэҕэ бэлэмниир үөрэх тэрилтэлэригэр саха тылын, литературатын уонна култууратын үөрэтэр усулуобуйаны тэрийии, тупсарыы, Олоҥхо педагогиката, аныгы ыалга оҕону сахалыы иитии, доруобуйаларыгар хааччахтаах оҕолорго төрөөбүт тылы үөрэтии уратыта, сахалыы үөрэтии хаачыстыбатын кэтээн көрүү, үрдэтии; куорат эйгэтигэр саха тылын үөрэтии кыһалҕатын уонна инникитин туһунан, саха тылын, литературатын, кэпсэтии тылын олимпиадатын туһунан, онтон да атын тыын боппуруостарга, тоҕоостоох тиэмэлэргэ төгүрүк остуоллар, санаа атастаһыылар ыытыллыахтара, иһитиннэриилэр буолуохтара, быыстапкалар тэриллиэхтэрэ. Дэлэгээттэр уонна сийиэс тэрийээччилэрэ «Саха» көрдөрөр-иһитиннэрэр хампаанньа былаһааккаларыгар кыттыыны ылыахтара.
Сийиэс сүрүн мунньаҕа сэтинньи 25 күнүгэр П.А. Ойуунускай аатынан Саха академическэй тыйаатырыгар буолуоҕа. Мунньах бырагыраамата киэҥ. «Сахам тыла үүнэ-сайда турдун!» диэн саха тылын уонна литературатын учуобунньуктарын, көмө босуобуйалар, оҕоҕо аналлаах сахалыы кинигэлэр, методическай литературалар быыстапкалара тэриллиэҕэ. «Саха Өрөспүүбүлүкэтигэр судаарыстыбаннай уонна дьиҥ таһымнаах тыллары харыстааһын уонна сайыннарыы» диэн өрөспүүбүлүкэтээҕи судаарыстыбаннай бырагыраама чэрчитинэн, анал бырайыактары сырдатыы буолуоҕа. Туспа бырагырааманнан Олоҥхо дэкээдэтин тэрээһиннэрэ ыытыллыахтара. С.Н.Донской-II аатынан Үөрэҕи сайыннарар уонна идэни үрдэтэр
үнүстүүккэ «Учуутал мастарыскыайа» диэн бастыҥ учууталлар, иитээччилэр маастар-кылаастара ыытыллыахтара.
Дэлэгээттэргэ анаан тэрийээччилэр умсугутуулаах бырагырааманы оҥордулар. Ол курдук, сүрүн үлэни таһынан култуурунай сынньалаҥ тэрээһиннэрэ (түмэлгэ, сахалыы киинэҕэ, испиэктээххэ сылдьыы) киллэрилиннилэр. С.Н.Донской-II аатынан Үөрэҕи сайыннарар уонна идэни үрдэтэр үнүстүүт үлэһиттэрэ идэ таһымын үрдэтэр куурустары ыытыахтара. Сийиэс бырагырааматын куйаар ситиминэн Саха тылын, литературатын уонна култууратын учууталларын III өрөспүүбүлүкэтээҕи сийиэһин сигэтигэр билсиэххэ сөп: https://съездучителей14.рф/
Дойду Бэрэсидьиэнэ Владимир Путин урут бэлиэтээбитинэн: «Үгэстэр, ураты төрүт тыллар Арассыыйа уопсай сыаната суох баайа, Хотугу, Сибиир уонна Уһук Илик норуоттарын култуурата ураты, чаҕылхай миэстэни ылар», -- диэн эппитэ. Санатар буоллахха, сэтинньи 4 күнүгэр судаарыстыба баһылыга Арассыыйа норуоттарын төрөөбүт тылларын күнүн балаҕан ыйын 8 күнүгэр сыллата бэлиэтиир туһунан ыйаахха илии баттаабыта. Бу туһунан Үөрэх уонна билим министиэристибэтин пресс-киинэ иһитиннэрэр.
Ойуу: Үөрэх уонна билим министиэристибэтин саайта.
-
1
-
0
-
0
-
0
-
0
-
0
