“Транспорт России” норуоттар икки ардыларынааҕы пуорум кэмигэр Айсен Николаев Салгын тырааныспарын федеральнай ааҕыныстыбатын (Росавиация) салайааччытын Дмитрий Ядровы уонна Арассыыйа тырааныспарын миниистирин солбуйааччы Валентин Ивановы кытта көрүстэ.
Кинилэр эрэгийиэн авиационнай инфраструктуратын дьүүллэстилэр. Көрсүһүү сүрүн тиэмэтинэн Зырянка бөһүөлэгин аэропордун саҥа былаһааккаҕа тутуу тула буолла. Айсен Сергеевич бу бырайыак Үөһээ Халыма улууһун олохтоохторугар тыын суолталааҕын санатта. Ол курдук, сааскы халаан кэмигэр көтөр-түһэр балаһа ууга баран, уһун кэмҥэ авиациянан сырыы харгыстанарын эттэ.
Зырянкаҕа аэропорду уу ылбат сиригэр тутуу Полярнай уонна Ньурба аэропортарын саҥардан оҥорууну сэргэ 2026 сылтан 2030 сылга диэри дойду Бэрэсидьиэнэ Владимир Путин көҕүлээбит “Көдьүүстээх тырааныспар ситимэ” национальнай бырайыак “Развитие опорной сети аэродромов” федеральнай бырайыак чэрчитинэн торумнаммыта. Кэпсэтии кэмигэр маны тэҥэ өрөспүүбүлүкэ авиация салаатын тэрилтэлэрин өйөөһүнү уонна тирэхтээхтик сайыннарыыны көрдүлэр. Чуолаан, хоту аэропортар ситимнэрин үлэлэрин көдьүүстээх оҥорууну үрдэтиини.
“Кинилэр үчүгэйдик үлэлииллэрин туһугар тиэхиньикэни саҥардыы уонна “Аэропорты Севера" тэрилтэни эбии өйөөһүн ирдэнэр. Бу өрөспүүбүлүкэ авиационнай ситимин туруктаах оҥорууга суолталаах усулуобуйа”, — диэн Айсен Николаев МАХ мессенджергэ тус бэйэтин ханаалыгар суруйбут.
Субсидиялаах тиэйиигэ уонна эрэгийиэннэр икки ардыларынааҕы морсурууттарга анал тарыыптары индексацяиялааһын, Дьокуускай аэропордун инники үлэтин туһунан эмиэ кэпсэттилэр. “Авиация өрөспүүбүлүкэҕэ ураты оруоллаах. Ыраах оройуоннары кытта ситимниир, дьоһун суолталаах эйгэлэр үлэлэрин өйүүр”, — диэтэ Ил Дархан көрсүһүү түмүгүнэн.
"Ити быһаарыылар олохтоохторго сөмөлүөтүнэн көтүүнү хааччыйыахтаахтар. "Көдьүүстээх тырааныспар ситимэ” нацбырайыагынан Өлүөхүмэ аэропордун саҥардыы үлэтэ салҕаныаҕа, ону тэҥэ 2027 сылга түмүктэниэхтээх Мииринэй к. аэропордун саҥа комплексын тутуу эмиэ.
Хаартыска: Росавиация пресс-сулууспата.
-
0
-
0
-
0
-
0
-
0
-
0
