Сииттэ нэһилиэгэ улууспутугар ыытыллар бары тэрээһиннэргэ көхтөөх кыттыыны ылар. Ол курдук, Кэбээйи сэлиэнньэтигэр ыытыллыбыт республиканскай «Олоҥхо муҥхатыгар» эдэр ыччаттарга аналлаах олоҥхо күрэҕэр, нэһилиэкпит кэскиллээх ыччата, олохтоох култуура дьиэтин уус — уран салайааччыта Афанасий Гуляев көхтөөх кыттыыны ылла. Кини «Кэскиллээх толорооччу» номинацияҕа тиксэн, бастакы олоҥхо толоруутугар хардыы баар диэн, сииттэлэр үөрэн, астынан олоробут. Олоҥхо декадатыгар түбэһиннэрэн, сылын аайы кырачааннарбытыгар, олоҥхоҕо аналлаах тэрээһиннэри олохтоох култуура киинин үлэһиттэрэ хайаан да тэрийэллэр Дабаан хаһыат саайтыгар Марианна Сивцева суруйар.

Быйыл эмиэ оҕолорбутугар анаан «Эрчимэн Бэргэн» олоҥхоттон быһа тардан көрдөрдүбүт. Быйылгы уратыбыт диэн таҥас куукулалары тигэн, бэлэмнээн, оҕолорго тиийимтиэ буоллун диэн илиилэрин — атахтарын хамсатан көрдөрдүбүт. Олохтоох библиотека сэбиэдиссэйэ Мария Обутова элбэҕи кэпсиир кинигэ быыстапката тэрийдэ, ону кытта олоҥхоҕо баар Эрчимэн Бэргэн ийэтин уобараһын толордо. Кинини кытта аҕа оруолун Николай Захаров, ону кытта олоҥхо сүрүн геройдарын, олохтоох дьаһалта үлэһиттэрэ Александра Иванова, Елена Васильева куукулалары тыыннаах курдук хамсатан, оонньоон, оҕолорбут сэргээн, астына көрдүлэр. Айыыһыт эбээлэри Наталья Гуляева, Надежда Ермолаева толордулар. Абааһы дьахтарын уобараһын — Марианна Сивцева, олоҥхону уустаан — ураннаан аахта Мария Александровна Захарова.

Бу дэкээдэ чэрчитинэн «Иис — куус абылаҥа» диэн нэһилиэкпит киэн туттар олохтооҕо, тарбаҕар талааннаах, сатабыллаах хаһаайка, иһирэх ийэ, эйэҕэс эбэ Ольга Ивановна Тимофеева иистэниэн баҕалаах кэрэ аҥардарга анаан маастар-кылаас оҥордо. Ольга Ивановна Сииттэтин, Кэбээйитин улууһун чиэһин араас быыстапкаларга кыттан элбэхтик ааттаппыта. Маастар-кылааска быйыл саҥа тикпит олоҥхотун панноларын бар дьонугар көрдөрдө, билиһиннэрдэ. Ольга Ивановна кыра уола быстах байыаннай дьайыыга сылдьыбыта номнуо төрдүс сыла. Кини билигин араас ыарахан сонуннары ситимҥэ аахпат, санаатын барытын ииһигэр уурар, ис сүрэҕиттэн айар — тутар. Тобуллаҕас толкуйун, иис абылаҥар уурар буолан, санаатын — оноотун онон аралдьытына сылдьар. Ольга Ивановна дириҥ ис хоһоонноох үлэлэригэр анаан, быыстапка тэрийэн, нэһилиэкпит оҕолоругар, бар дьонугар көрдөрөр, билиһиннэрэр былааннаахпыт.

Ити курдук сииттэлэр Олоҥхо ыһыаҕар бэлэмнэнэн улууспут аатын дорҕоонноохтук ааттатыахпыт диэн эрэлбит улахан.

Марианна Сивцева

Хаартыскалар:  "Дабаан" хаһыат