Мунньаҕы баһылык бастакы солбуйааччыта Георгий Гаврильев салайда. Дьокуускай Дууматын дьокутааттара, дьаһалта структурнай тэрилтэлэрэ, М.К. Аммосов аатынан ХИФУ Үп-харчы, экэниэмикэ институтун устудьуоннара, куорат олохтоохторо кытыннылар. Публичнай истии биллэриитэ дьаһалта официальнай саайтыгар сэтинньи 17 күнүгэр тахсыбыта.
“О прогнозе социально-экономического развития городского округа “город Якутск” на 2025-2027 годы” дакылааты дьаһалта үп-харчы уонна стратегическай былааннааһынын дэпэртээмэнин начаалынньыга Айсен Тихонов аахта.
Куорат бүддьүөтүн бырайыагын тиэмэтигэр дьаһалта үпкэ-харчыга дэпэртээмэнын начаалынньыга Ольга Максимова тыл эттэ. Кини бүддьүөт бырайыага, сүрүннээн, социальнай хайысханы хааччыйарга ананан оҥоһуллубутун бэлиэтээтэ. Ону таһынан куораты тупсаран оҥоруу уонна инфраструктуратын сайыннарыы кыһалҕаларын быһаарарга үп-харчы көрүллүбүт.
2026 сыллаҕы бүддьүөт бырайыагар 17 422 мөл. солк. үп-харчы былааннаммыт. Ороскуот 18 040 мөл. солк. тэҥнэһэр чинчилээх. Дэпэсиит – 618 мөл. солк. 2027 сылга 18 614 мөл. солк. былааннанар, ороскуот – 18 684 мөл. солк., дэписсиит – 70 мөл. солк. 2028 сылга дохуокка да, ороскуокка да тэҥ суума – 19 809 мөл. солк. – былааннанар. Иэс РФ Бүддьүөтүн кодекса бигэргэппит нуорматын куоһарбат.
2026-2028 сс. Дьокуускай үбүн-харчытын сүрүн докумуонугар 22 муниципальнай бырагырааманы олоххо киллэрэргэ үп көрүллүбүт. 2026 сыллаахха национальнай уонна эрэгийиэннээҕи бырагыраамаларга куорат салгыы кыттыаҕа. Федеральнай уорганнары уонна өрөспүүбүлүкэ толорор уорганнарын кытта үлэ былаан быһыытынан барар.
Бүддьүөт бырайыагын публичнай истиитигэр Дьокуускай куорат Дууматын бастайааннай хамыыһыйатын экэниэмикэҕэ уонна инбэстииссийэҕэ бэлиитикэтин бэрэссэдээтэлэ Яков Оконешников, СӨ Үпкэ-харчыга министиэристибэтин бүддьүөт дэпэртээмэнин салайааччыта Дария Романова, М.К. Аммосов аатынан ХИФУ “Экэниэмикэ уонна үп-харчы” хаапыдыратын дассыана, Дьокуускай Уопсастыбаннай палаататын чилиэнэ Афанасий Федоров, “Центр стратегических исследований при Главе Республики Саха (Якутия)” макроэкономическай борогунуостааһын уонна стратегическай былааннааһын отделын салайааччытын солбуйааччы Анна Луковцева.
Бүддьүөт бырайыагын көрүү публичнай истиитин түмүгэ “Эхо столицы” хаһыакка бэчээттэнэр, дьаһалта официальнай саайтыгар тахсар.
Дьокуускай пресс-сулууспатын хаартыската.
-
0
-
0
-
0
-
0
-
0
-
0
