Маннык хос моделлаан оҥоруу эрэгийиэн сайдыытын салайыы көдьүүһүн үрдэтэр. Ол курдук сир-уот виртуальнай модела аныгы бэйэтэ көтөр авиационнай системалар көмөлөрүнэн түмүллэр - кинилэр инфраструктура, айылҕа эбийиэктэрин уонна олорор сирдэр туһунан билиҥҥи хартыынаны барытын тута туох баарынан хомуйа тураллар. Холобура, сыыппара игирэ аҥара суолга туох-хайдах балаһыанньа баарын, социальнай эбийиэктэри тутуу хаамыыта хайдах баран иһэрин тута көрдөрө турар. Онон территория сайдыытын ордук чопчулаан былаанныырга, олох хаачыстыбатын үрдэтэргэ, ыксаллаах быһыы-майгы үөскээтэҕинэ суһаллык дьайарга уонна экологическай балаһыанньаны кэтээн көрөргө туһалыаҕа, түргэнник быһаарыы ылынарга көмөлөһүөҕэ.
Бу хайысхаҕа биир табыллыбыт холобурунан Сахалин уобалаһа буолар: эрэгийиэни барытын бэйэтэ көтөр систиэмэ көмөтүнэн түһэрэн ылбыттар, онон бу сир-уот барыта сыыппара игирэ аҥаардаммыт. Онон сири барытын учуокка ылбыттар, инфраструктураны хонтуруоллууллар уонна былаанныырга ордук толору дааннайдары туһанар кыахтаммыттар.
РФ Федерация Сэбиэтин иһинэн сыыппара экэниэмиэктин Сэбиэтигэр «Сыыппара эрэгийиэннэр: бастыҥ быраактыка уонна сайдыы стратегията» сиэксийэ салайааччыта Анатолий Курманов технологиялар сайдар кэмнэригэр ордук куттал суох буолуутун суолтатын бэлиэтиир. Кини сэрэтэринэн, билигин информационнай уонна кибер куттал суох буолуутун хааччыйыы ордук наадалаах. Технологиялар быыһылааһынтан уонна таһыттан дьайыыттан эрэллээх көмүскэллээх буолуохтаахтар.
Сиэссийэ кэмигэр барбыт дьүүллэһии уонна кэпсэтии түмүгүнэн Саха Сирин баайга-дуолга уонна сир сыһыаннаһыыларыгар миниистирэ Павел Багынанов бэйэтэ көтөр систиэмэлэри туттан эрэгийиэн сыыппара игирэтин аҥаарын оҥоруу территорияны салайыыны олох саҥа таһымҥа таһаарыан сөбүн эттэ. «Бу инникибит. Онон биһиги бу өттүгэр, сыыппара эрэгийиэн игирэтин аҥаарын оҥорууга иннибит диэки баран иһиэхтээхпит. Саха Сирин Ил Дархана бу көҕүлээһини өйөөбүтэ, бырайыагы олоххо киллэри үчүгэйи, кэскиллээҕи эрэ аҕалара биллэр». -диэн эрэлин биллэрдэ .
Хаартыскалар: "Сыыппара алмаас" саайтан
-
2
-
0
-
0
-
0
-
0
-
0
