Видеоконференц-сибээһинэн Ил Түмэн олохтоох бэйэни салайыныыга сис кэмитиэтин бэрэссэдээтэлэ Владимир Прокопьев уонна Ил Түмэн ыччат дьыалаларыгар, физическэй култуураҕа уонна успуорка сис кэмититиэт бэрэссэдээтэлэ Георгий Балакшин, СӨ Ил Дарханын уонна Бырабыыталыстыбатын Дьаһалтатын олохтоох салайыныы боппуруостарыгар департаменын салайааччытын солбуйааччыта Афанасий Старостин, итиэннэ Ньурба улууһун баһылыга Алексей Иннокентьев, улуус салайааччылара , МТ урукку уонна билиҥҥи баһылыктара, тэрилтэлэр салайааччылара, дьокутааттар кытыннылар.
Владимир Михайлович Прокопьев уонна Афанасий Иванович Старостин быһа сибээһинэн тахсан олохтоох салайыныы сокуонун саҥа бырайыагын сиһилии билиһиннэрдилэр, ыйытыыларга хоруйдаатылар.
Боломуочуйалар тыырсыыларыгар, нэһилиэк сэбиэтин бэрэссэдээтэлигэр, нэһилиэк баһылыктарыгар туруоруллар ирдэбиллэргэ сыһыаннаах уо.д.а. ыйытыктар киирэн хоруйданнылар.
Ахсынньы 12 күнүгэр диэри Ил Түмэҥҥэ улуустар этиилэрин ыытыахтаахтар, сокуон бырайыага ахсынньы 24 к. Ил Түмэн 16- уочараттаах пленарнай мунньаҕар көрүллүөхтээх. Бу сокуон туһунан сонуннары киэҥник тарҕатар сириэстибэлэргэ элбэхтэ таһааран тураллар.
Алтынньы бүтэһигэр Владимир Прокопьев СӨ Ил Дарханын сүбэһитэ Игорь Николаевы кытта кэлэн баһылыктары, дьокутааттары, уопсастыбаннас бэрэстэбиитэллэрин кытта эмиэ көрсөн, мунньахтаан барбыта. Ол эрээри хаһан баҕарар кэпсэтиигэ ыйытык син-биир баар буолар. Ахсынньы 5 к. Владимир Михайлович Прокопьевтаах Ньурбаҕа кэлиэхтэрин эттилэр.
Салгыы улуус уонна МТ баһылыктара, дьокутааттар уонна тэрилтэлэр салайааччылара кытта санаа атастаһыытын бэрээдэгинэн кэпсэттилэр. Улуус баһылыга Алексей Иннокентьев олохтоох салайыныыга саҥа киириэхтээх уларыйыыларынан, бастатан туран, дьокутааттар статустара үрдүүрүн бэлиэтээтэ.
Кинилэр нөҥүө дьон быыбардыыр бырааба олоххо киирэр, дьокутааттар нэһилиэк уонна улуус баһылыктарын талаллар, кини талбыттарынан нэһилиэк баһылыгын улуус баһылыга, улуус баһылыгын СӨ Ил Дархана аныыр. Онон дьокутааттартан ирдэбил даҕаны күүһүрэр. Атын өттүнэн, сэбиэскэй кэм саҕана салайааччылары бэлэмнээн-такайан үүннэрэр үчүгэй быраактыка баара, ол төннөн кэлэр.
Итини сэргэ мунньахха нэһилиэктэр баһылыктарыгар сыһыаннаах тэрээһин үлэтин боппуруостарын туһунан кэпсэтии барда. Ол иһигэр нэһилиэктэр кэлим Спартакиадаларыгар сорох нэһилиэктэр кыттыбаттара сэмэлэннэ. МТ баһылыктарыгар тыа хаһаайыстыбатын боппуруостарыгар, Саха Өрөспүүбүлүкэтин норуоттарын IX успуорт оонньууларыгар бэлэмнэнии чэрчитинэн тупсарыы уонна саҥардыы үлэтигэр болҕомто ууралларыгар этилиннэ.
Геннадий АНТОНОВ.
-
2
-
0
-
0
-
0
-
0
-
0
