Мунньах оройуон дьаһалтатын дьиэтин аактабай саалатыгар улууска баар үөрэх тэрилтэлэрин салайааччыларын түмтэ.

Биир сүрүн ырытыллыбыт боппуруоһунан оройуон үөрэҕириитин систиэмэтигэр үлэһит ахсаанын 290-нан аҕыйатыы былаана буолла. Кыттааччылар бу ньыма үөрэх хаачыстыбатыгар, чуолаан политехническай уонна агро оскуолаларга, ону тэҥэ интэринээт-оскуолаларга дьайыан сөбүн туһунан долгуйууларын биллэрдилэр. Бу тэрилтэлэр салайааччылара боппуруоһу салгыы өрөспүүбүлүкэ уонна дойду таһымыгар көрөр наадалааҕын тоһоҕолоон, парламент куорпуһун кытта үлэлэһэргэ этии киллэрдилэр.

Биллэрин курдук, Сунтаар Саха сирин биир саамай улахан тыа хаһаайыстыбатынан дьарыктанар оройуона буолар. Ол курдук, оробуочай сырыы иккис күнүгэр «Килбиэн – 2025» тэрээһиҥҥэ тыа сирин сайдыытыгар ураты болҕомто уурулунна. Андрей Николаев уонна Афанасий Постников бурдук үүнүүтүн уонна үүт-эт оҥорон таһаарыытын үрдэтиигэ улахан кылааты киллэрбит тыа хаһаайыстыбатын үлэһиттэригэр наҕараадалары туттардылар. Тыа хаһаайыстыбатын миниистирин бастакы солбуйааччыта Анна Стручкова министиэристибэ бырагырааматын көдьүүһүн бэлиэтээтэ. Ол курдук, Тойбохойго бурдук харайар саҥа эбийиэк арылынна уонна тыа сирин комплекснай сайдыытын федеральнай бырагырааматын чэрчитинэн промышленность үлэһиттэрэ саҥа дьиэҕэ киирдилэр.

Салгыы дьокутааттар гражданнары кытта тус көрсүһүүнү ыыттылар.

Ол курдук, улуус олохтоохторуттан үс көрдөһүү көрүлүннэ.

П. гражданин социальнай бырагыраама нөҥүө дьиэнэн хааччыйыыга көмө көрдөөтө. Ол түмүгүнэн Дьокуускай куорат үөрэҕин управлениетыгар уонна Саха политехническай лиссиэйигэр ити туһунан хадаатайыстыба ыытарга быһаардылар. Кэмитиэт аатыттан бу тэрилтэлэргэ сурук ыытыллыаҕа.

А. гражданин көрдөһүүтэ Түбэй нэһилиэгин оскуола саадын инфраструктуратын тупсарыыга сыһыаннаах этэ. Быһыыны-майгыны уонна хаарбах тутууну көтүрэргэ уочараты чопчулаары Дьокуускай куорат баай-дуол уонна олорор дьиэ сыһыаннарын департаменыгар ыйытык ыытар туһунан быһаарылынна. Хонтуруоллуур кэмитиэт үөскээбит балаһыанньа туһунан Департамеҥҥа туһаайан иһитиннэриэхтээх.

Е. гражданин 2001 сыллаахха дьиэтигэр баһаар тахсыбытын туһунан боппуруоһу сөргүтэн көтөхтө. Кини оҕотугар реабилитацияҕа көмөлөһөөрү СӨ Үлэ уонна социальнай сайдыы министиэристибэтигэр хадаатайыстыба бэриллиэҕэ. Сурук барылын кэмитиэт бэлэмнээн ыытыаҕа.

Бары көрдөһүүлэр Хонтуруоллуур кэмитиэт бэрэссэдээтэлин тус көрүүтүгэр-истиитигэр ылылыннылар. Сайабылыанньа биэрээччилэргэ бу үлэ түмүктэрин туһунан биллэриэхтэрэ.

Ил Түмэн пресс-сулууспата

Хаартыска: Ил Түмэн саайт