Саҥа эриэйси аһар үөрүүлээх тэрээһиҥҥэ РФ Бэрисидьиэнигэр Саха өрөспүүбүлүкэтин Бастайааннай Бэрэстэбиитэлэстибэтин салайааччытын 1-кы солбуйааччы Александр Сафронов, РФ Бэрэсидьиэнигэр Дагестан өрөспүүбүлүкэтин Бастайааннай Бэрэстэбиитэлэстибэтин салайааччытын 1-кы солбуйааччы Гамзат Гамзатов, «Внуково» аэропорт салайар уонна үлэни сүрүннүүр киинин дириэктэрэ Александр Баранов уонна «Якутия» авиахампаанньа генеральнай дириэктэрин сүбэһитэ Вячеслав Абрамян кыттыыны ыллылар.
«Якутия” авиахампаанньа аан дойду саамай тыйыс айылҕалаах дойдутугар үлэлииринэн сибээстээн, стратегическэй суолталаах тэрилтэнэн биллэр-көстөр. Арассыыйа үрдүнэн авиахампаанньалар ортолоругар дьону таһыыга 20-с иһигэр киирэр. Тэрээһиҥҥэ кыттыбыт салайааччылар “Якутия” курдук эрэллээх хампаанньа Москва-Махачкала-Москва хайысханан көтөр буолбута дьон атын норуоттар олохторун-дьаһахтарын, устуоруйаларын билсэллэригэр далаһа быраҕарын, итини тэҥэ, Дагестан уонна Саха сирэ социальнай-экэнэмиичэскэй, култуура өттүнэн бииргэ үлэлииллэригэр улахан көдьүүстээх буолуохтааҕын туһунан эттилэр.
Саҥа эриэйис Внуковоттан Boeing-737/700 уонна Boeing-737/800 сөмөлүөттэринэн, нэдиэлэ бээтинсэтигэр (07:40 ч.) уонна баскаһыанньатыгар (17:20 ч.) оҥоһуллуоҕа. Онтон Махачкалаттан бээтинсэҕэ 11:10 ч., баскаһыанньаҕа 20:50 ч. көтүөхтэрэ. Тустаах хампаанньа былырыын 12 тыһ. эриэйси оҥорбут, 700 тыһ. кэриҥэ пассажиры таспыт.
-
0
-
0
-
0
-
0
-
0
-
0
