Тохсунньуттан кырдьаҕастар, инбэлииттэр уонна иитэр-аһатар дьоннорун сүтэрбиттэр страховой биэнсийэлэрэ 7,6%-нан үрдүөҕэ.
“Биэнсийэ биир кээписиэнэ 156 солк. 76 кэп. буолуоҕа, оттон бигэргэммит төлөбүр 9584 солк. 69 кэп. тэҥнэһиэ. Бырабыыталыстыба сыаналыырынан, кырдьыбытынан (по старости) бэриллэр страховой биэнсийэ ыйга ортотунан 27 тыһ. солк. тиийэ үдрүөҕэ”, – диэн Госдума дьокутаата Алексей Говырин “Парламент хаһыатыгар” кэпсээбит. Биэнсийэ “автоматом” үрдүөхтээх, ханна да сайабылыанньа суруйар ирдэммэт.
Сорох биэнсийэлээхтэр тохсунньутааҕы үрдээбит биэнсийэлэрин арыый эрдэ, ахсынньы бүтүүтүгэр, ылыахтара.
“Ый 12 чыыһылатыгар диэри биэнсийэни баан каартатынан ылааччылар харчылара быйыл эрдэ түһүөҕэ – ахсынньы бүтүүтүгэр. Биллэн турар, ити Саҥа дьыл өрөбүллэрин кытта сибээстээх уларыйыы”, – диэн РФ Үлэҕэ министиэристибэтин салайааччыта Антон Котяков иһитиннэрэр. Бэлиэтээн эттэххэ, ити – биэнсийэ бэриллэр графигын уларыйыыта эрэ: “эбии биэнсийэ”, “13-с төлөбүр” эҥин буолбатах. Оттон олунньутааҕы биэнсийэ кэлэр кэмигэр кэлиэҕэ. Онон үбү-аһы эрдэттэн аахпыт-суоттаммыт ордук.
Биэнсийэни почтаттан ылар дьон киэнэ кэмигэр кэлиэҕэ, кинилэр харчыны ылар урукку болдьохторо уларыйбат.
Ахсынньыга 80 саастаарын туолбут дьон биэнсийэтэ тохсунньуттан биллэ үрдүөҕэ. Ол курдук, ыйдааҕы мэктиэлэнэр төлөбүр 9584,69 солк. 19169,38 солк. тиийэ эбиллиэҕэ.
Тохсунньуттан үрдээбит биэнсийэни соторутааҕыта эрэ бочуоттаах сынньалаҥҥа барбыт дьон эмиэ ылыахтара. Санаттахха, 2016—2024 сс. кинилэр биэнсийэлэрэ кумааҕыга эрэ индексацияланара. Судургутук эттэххэ, кинилэр биэнсийэлэрэ үрдээбитин туһунан докумуоҥҥа суруллара эрээри, үлэлии сылдьар буоланнар, “көннөрү” биэнсийэни эрэ ылаллара.
Хаартыска: Парламентская газета
-
0
-
0
-
0
-
0
-
0
-
0
