Уопсастыба

Ю.А. Гагарин аатынан Култуура уонна ускуустуба киин “Космос” айар киинигэр уопсастыбанньыктар 12 бырайыагы кэпсээтилэр.

Ол курдук,

– “Гражданины иитии, оҕо эрдэхтэн дойдуга бэриниилээх буолуу” тиэмэҕэ “Настаабынньыктар куораттара” куорат бырагыраматын үлэлэтии (сүрүн сыала – дьиэ кэргэн институтун, настаабынньыктааһыны, төрөппүттэр өйөбүллэрин тэрийии уо.д.а.);

– “Уопсастыбаннай тырааныспар уонна табыгастаах мобильность” тиэмэҕэ оптуобус сүрүн тохтобулларыгар чат-бот мобильнай сыһыарыыны киллэрэр, муниципальнай тырааныспыр пааркатын намыһах оптуобустарынан хааччыйар уо.д.а. идиэйэлэр киирдилэр;

– “Устуоруйа кэрэһитэ, наследие уонна куоарт идентичнаһа” тиэмэҕэ устуоруйа-култуура сэбиэтин тэрийии, “Дьокуускай – Үлэ албан аатын куората” этиини көхтөөхтүк туһанар, Дьокуускай 400 сылыгар брендбук оҥорор идиэйэлэр бааллар;

– “Ыччат, үөрэхтээһин уонна куораты салайыыга кыттыы” тиэмэҕэ ыччат сэбиэтин тэрийиини уонна “Якутск 2032: ыччат көрүүтэ” пуоруму сыл аайы тэрийэр туһунан эттилэр;

– “Гражданскай көҕүлээһиннэр, НКО уонна волонтёрдааһын” тиэмэҕэ уопсастыбаннай дьүүллэһиилэр, көҕүлээһиннэр онлайн-платформаларын үлэлэтии, НКО-ҕа аналлаах дьоҕус граннар систиэмэлэрин оҥоруу уо.д.а.;

– “Куорат эйгэтэ, тупсаран оҥоруу уонна биир кэлим дизайн-код” тиэмэҕэ куорат дьиэлэрин фасадтарын, рекламалары, ыйанан турар суруктары тэҥ дизайнаах оҥоруу, уопсастыбаннай сирдэри тупсарыы, вандилизмы аҕыйатыы уо.д.а. туһунан эттилэр;

– “Доруобуйа култуурата уонна көхтөөх уһун үйэлэнии” тиэмэҕэ “Доруобуйа ыллыга” уонна тиэргэҥҥэ дьарыктанар бырагырааманы үлэлэтии, “Доруобуйа оскуолата”, “3-с көлүөнэ” кулууба пилотнай бырайыактары олоххо киллэрии уо.д.а. этиилэр киирдилэр.

Ону таһынан “Социальнай көмө, кыаммат дьону көрүү-истии, өйөбүл буолуу”, “Дьиэ-уот, тиэргэр уонна кыттыгас тупсаран оҥоруу”, “Дьиэ кэргэн, оҕо уонна төрөппүт эппиэтинэстээх буолуута”, “Куорат экологията, кыыла-көтөрө уонна айылҕата”, “Биир дойдулаахтар түмсүүлэрэ, көлүөнэлэр ситимнэрэ” тиэмэлэргэ эмиэ интэриэһинэй этиилэр киирдилэр.

Баһылык Евгений Григорьев Дьокуускай уопсастыбаннаһыгар махтанна, киирбит сорох этиилэргэ санаатын үллэһиннэ.

– Уопсастыбаннай тырааныспар айанныырыгар суолга туспа балаһаны аныыр, биллэн турар, үчүгэй этии. Бастаан Туймаада ыһыаҕар айанныырга туспа балаһаны аныахха диэн идиэйэлээхпин. Тэрийэн көрүөхпүт, салгыы көстөн иһиэ.

Оптуобус суоппарыгар айанныыр дьон сыанабылынан хамнаһын төлөөһүн – интэриэһинэй этии. Холобур, бастыҥ суоппарга диэн бириэмийэ көрүөххэ сөп. Хайа суоппар ыларын айанныыр дьон бэйэлэрэ талаллар.

Куорат түмэллэрин сайыннарыы – суолталаах уонна наадалаах. Дьокуускай 400 сааһын туолуон иннинэ ситиһэр наада. Бу хайысхаҕа уопсастыбанньыктар бэйэлэрэ идиэйэлээх тахсыбыттара олус үчүгэй. Булгуччу болҕомтоҕо ылыахпыт.

Баһылык иһинэн тэриллэн үлэлиир устуоруйа-култуура сэбиэтэ үлэҕэ баар.

400 сылы көрсө брендбук оҥоруу – эмиэ бэртээхэй тиэмэ. Дьокуускай куорат символа биһиги, куорат олохтоохторо бүттүүн, уопсай сыаннастарыбытын көрдөрүөхтээх.

Ыччат сэбиэтэ тэриллэрэ эмиэ оруннаах. Ыччат санаатын истэрбит хайаан да наада. Дьокуускай нэһилиэнньэтэ эдэр, орто саас – 35.

Куорат тэҥ дизайн-кодтаах буолуохтаах. Манна хамсааһын барыаҕа.

Тиэргэн дьарыктарын саҕалыахпыт.

3-с көлүөнэ оскуолатын туһунан элбэхтик толкуйдуубут, үлэ барыаҕа.

Скандинавскай хаамыыга “Доруобуйа ыллыгын” тэрийиигэ үлэ саҕаланан эрэр, салгыы ыытыллыаҕа.

Оҕо оонньуур ичигэс былаһааккаларын боруобалаан көрүөхпүт. Биһиэхэ буолбатаҕына, уонна ханна маннык ичигэс былаһааккалар наада буолуохтарай?

Ыттары күүлэйдэтэр былаһаакканы тэрийэр наадалаах. Куоракка ыттаах дьон элбэх.

Таһаарыылаах, туһалаах үлэҕит иһин махтанабын. Эһиги санааҕытын учуоттаан салгыы үлэлиэхпит. Киирбит этиилэртэн үгүстэрэ Дьокуускай дьаһалтатын үлэтигэр көстүөхтэрэ, – диэн эттэ.

Санатан эттэххэ, 12 стратегическай сиэссийэ түмүгүнэн Дьокуускай куорат олохтооҕун Кодекса ылылынна. Манна 500 кэриҥэ киһи кыттыыны ылла.

Дьокуускай дьаһалтатын пресс-сулууспатын хаартыската.