Ил Түмэн бэрэссэдээтэлэ Алексей Еремеев, СР Култуураҕа уонна духуобунай сайдыыга миниистирэ Афанасий Ноев, СӨ норуотун дьокутаата, Ем.Ярославскай аатынан Дьокуускайдааҕы судаарыстыбаннай история уонна хотугу норуоттар култуураларын холбоһуктаах түмэлин салайааччыта Николай Бугаев, Таатта улууһун баһылыга Айаал Бурцев, улуус Мунньаҕын бэрэссэдээтэлэ Петр Максимов, улуустааҕы норуот айымньытын дьиэтин салайааччыта Изабелла Сивцева Октябрьскай нэһилиэгэр П.А.Ойуунускай аатынан Саха Өрөспүүбүлүкэтин судаарыстыбаннаһын түмэлигэр үлэлээтилэр.
Түмэл директора Михаил Аржаков оҥоһуллуохтаах реэкспозиция кэнсиэпсийэтин билиһиннэрдэ. Исписэлиистэр Светлана Халгаева, Анна Борисова түмэлгэ баар матырыйаалларын билиһиннэрдилэр. Салгыы экпсэтиигэ кыттыһан Чөркөөхтөөҕү норуот айымньытын дьиэтин дириэктэрэ Михаил Прохоров нэһилиэккэ култуура тэрилтэтин дьиэтин туруоруста.
Өрөспүүбүлүкэ, улуус салалтата түмэлгэ ыытылла турар хапытаалынай өрөмүөн хаамыытын көрдүлэр-иһиттилэр, салҕыы ыытыллыахтаах үлэни торумнаатылар.
СӨ култуураҕа уонна духуобунай сайдыыга миниистирэ Афанасий Иванович Ноев түмэл өрөмүөнүн иккис түһүмэҕэр өрөспүүбүлүкэ бүддьүөтүттэн 1 700 000 солкуобай көрүллүбүтүн иһитиннэрдэ.
Ил Түмэн испиикэрэ Алексей Ильич Еремеев ыытылла турар үлэ туһунан санаатын үллэһиннэ:
Былаан быһыытынан бу музейга хапытаалынай өрөмүөҥҥэ 2025 сылга өрөспүүбүлүкэ бүддьүөтүттэн үп-харчы көрүллүбүтэ.Саха Сиригэр улуу дьоммутугар аналлаах түмэллэр: М.К.Аммосов аатынан Нам улууһун Хатырыгар, П.А.Ойуунускай аатынан Таатта Чөркөөҕүгэр, И.Н.Барахов аатынан Үөһү Бүлүү Харбалааҕар бааллар. М.К.Аммосов аатынан түмэли чөлүгэр түһэрэммит, аныгы кэм ирдэбилигэр эппиэттэһэр интерактивнай кыахтаах гына экспозициятын уларыттаран, 2022 сыллааха өрөспүүбүлүкэбит төрүттэммитэ 100 сылын туоларыгар хапытаалынай өрөмүөн үлэтэ ыытыллыбыта.
П.А.Ойуунускай түмэлин дьиэтэ хамсаан, улахан тымныыларга толору хааччылыытын (благустройствотын) ситимэ үлэлээбэт турукка турбута. Былаан быһыытынан, өрөмүөн бастакы түһүмэҕэр дьиэтин-уотун туругун тупсарыыга үлэлээн, иккис түһэмэххэ экспозициятын аныгы кэм ирдэбилигэр эппиэттэһэр гына оҥорорго сорук турбута. Өрөмүөн бастакы түһүмэҕэ бүттэ. Балаҕан ыйыгар бүтүөхтээх үлэ муостатын уонна канализациятын үлэтэ тардыллан, бу сылы баттаһа бүппүтүн бу бүгүн көрө-истэ сылдьабыт. 2026 сылга өрөспүүбүлүкэ бүддьүөтүттэн өрөмүөн иккис түһүмэҕэр – экспозицияны саҥардан, тупсаран оҥорууга үп-харчы көрүлүннэ, онно ыытыллыахтаах үлэ торумун кэпсэттибит.
П.А.Ойуунускай саха норуотун тылынан уус-уран баайын сурукка киллэрбит, билимҥэ үйэтиппит улуу киһибит буолар. Онон кини ыыппыт үлэтин-хамнаһын бар дьоҥҥо киэҥник сырдатар, аныгы кэм ирдэбилигэр эппиэтэһэр өрөспүүбүлүкэбит биир дьоһун түмэлэ экспозицията ситэн-хотон, 2026 сыл балаҕан ыйыгар диэри бүтэрэ күүтүллэр.
Галина ПОЛУСКИНА.
Василий Кононов хаартыскаҕа түһэриитэ.
-
1
-
0
-
0
-
0
-
0
-
0
