Сүрүн тэрээһиннэр бырайыактарын мунньаҕы салайан ыыппыт СӨ Ил Дархана Айсен Николаев билиһиннэрдэ. «Дойду бэрэсидьиэнэ Владимир Путин ыйааҕынан кэлэр сыл Арассыыйа норуоттарын сомоҕолоһууларын сылынан биллэрилиннэ. Мин Ил Түмэҥҥэ туһаайан этиибэр 2026 сылы өрөспүүбүлүкэҕэ Култуура сылынан биллэрбитим. Бу саҕалааһыннар бэйэ-бэйэлэрин ситэрсэн биэрэллэр. Биһиги кэскилбит — баай култууралаах уонна устуоруйалаах, айар кыахтаах, күүстээх, элбэх омуктаах, сомоҕолоспут норуоттар кэскиллэрэ», — диэн Айсен Николаев эттэ. Кини бу сыл сэтинньи 25 күнүгэр ылыныллыбыт национальнай бэлиитикэ саҥа стратегията 2036 сылга диэри көрүүлээҕин бэлиэтээтэ. Дойду сүрүн сыалынан элбэх омуктаах норуот сомоҕолоһуутун бөҕөргөтүү буолар. Арассыыйа нэһилиэнньэтин ахсаанынан аан дойдуга уон бастакы ахсааныгар киирэр. Дойдуга 190-тан тахса омук олорор, 300-тэн тахса тыл туттуллар, онтон 100-тэ — Арассыыйа Федерациятын норуоттарын тыллара. «Биһиги уопсай үлэбитигэр омуктар икки ардыларынааҕы сыһыаны өйдөөһүнү уларытыы, норуоттар култуураларын сайыннарыыны бөҕөргөтүү олус суолталаах», — диэн Айсен Николаев эттэ.
Ол курдук, кэлэр сылга Саха Сиригэр "Этносоциальные процессы в Сибири и на Дальнем Востоке: проблемы и возможности межнационального согласия" Бүтүн Арассыыйатааҕы научнай-практическай кэмпириэнсийэ, "Арктика: настоящее и будущее"норуоттар икки ардыларанааҕы пуорум, киэҥ далааһыннаах бэстибээллэр, куонкурустар, быыстапкалар, лиэксийэлэр цикллара уо.д.а уопсастыбаннай тэрээһиннэр былааннаннылар. Саха Сирин норуоттарын Ассамблеятын норуоттары сомоҕолуур бырайыактарын олоххо киллэриэхтэрэ.
Мунньахха ааһан эрэр сылга Саха Сиригэр норуоттар сомоҕолоһууларын бөҕөргөтүүгэ уонна омуктар икки ардыларынааҕы сыһыаны дьүөрэлээһиҥҥэ анаммыт национальнай-култуурунай түмсүүлэр уонна хаһаахтар уопсастыбаларын суолталаах бырайыактара өйөбүлү ылбыттара бэлиэтэннэ. Ааһан эрэр сыл биир суолталаах тэрээһининэн Дьокуускайга тас дойду кыраасданнарын социальнай уонна култуурунай адаптациятын киинэ тэриллибитэ буолар. Өрөспүүбүлүкэҕэ олорор норуоттар култуураларын уонна үгэстэрин сайыннарыыга анаммыт элбэх тэрээһин ыытылынна, Хотугу аҕыйах ахсааннаах төрүт омуктар тылларын уонна духуобунай култуураларын харыстааһыҥҥа уонна сайыннарыыга бырайыактар олоххо киирдилэр.
Хаартыскалар sakha.gov.ru
-
0
-
0
-
0
-
0
-
0
-
0
