Иван Петрович Ушницкай олоҕун барытын суруналыыстыкаҕа анаабыта. Бу судургута суох эйгэҕэ бастакы хардыытын 1985 сыллаахха өрөспүүбүлүкэтээҕи «Эдэр коммунист» хаһыакка кэрэспэдьиэнинэн үлэлээн саҕалаабыта. Салгыы бу хаһыакка айар талаана арыллан, успуорт туһунан суруйуулара, устуоруйаны, култуураны саҥалыы көрөр ыстатыйалара Саха Сирин бары ааҕааччыларын улахан сэҥээриитин ылбыттара.
1993 сыллаахха эдэр ыччакка анаммыт «Эдэр саас» өрөспүүбүлүкэтээҕи хаһыаты тэрийэн таһааран, бу сылларга Саха Сиригэр саамай күүтүүлээх, сэргэх, ааҕыллымтыа хаһыатынан биллибитэ.Уопсай тирааһынан муҥутуур үрдүк кирбиилэри ылбыта. Бу хаһыаты кытта Саха Сиригэр бастакы ыччат аахсыйалара, аныгылыы шоулар, бырайыактар ыытыллар буолбуттара. Уопсастыбаннас олоҕор урут суох саҥа сүүрээннэр киирбиттэрэ.
Биир сиргэ турбат, куруук сайдыы, саҥаны арыйыы көрдөөһүнүгэр сылдьар киһи салгыы «Орто дойду» хаһыаты тэрийэн, ол кэмҥэ уопсастыба наадыйар хаһыатын норуотугар ууммута. Бу хаһыат бэйэтин кэмигэр саха норуота бэйэтин омук быһыытынан сыаналааһыныгар ураты улахан оруолу оонньообутун, бүтүн көлүөнэ иитиллэн тахсыбытын үгүстэр билинэр буолуохтаахтар.
Уйбаан Бөтүрүөбүс салгыы «Киин куорат» куораттааҕы сахалыы тыллаах хаһыат кылаабынай эрэдээктэринэн үлэлээн, төрөөбүт тылынан тахсар таһаарыы атаҕар турарыгар турууласпыта. Кэлин биллиилээх суруналыыс публицистикаҕа ылсан, суруйуулара хаһыаттарга, сурунаалларга тахсаллар. Кэлиҥҥи сылларга «Саха саргыта» сурунаал кини эрэдээксийэтинэн тахсар буолбута.
Уйбаан Бөтүрүөбүс улахан уопсастыбаннай үлэни ыытан кэлбит, саха дьонун-сэргэтин санаатын туппут, сырдыкка, үрдүккэ угуйбут киһинэн буолар. Кини олоҕо дьүккүөр, мөккүөр доҕуһуоллаах, тулуур, дьулуур аргыстаах, ону кытта төрөөбүт дойдуга, норуокка сөҕүрүйбэт итии тапталы өрө тутуу үтүө холобуранан буолар.
Кини 1989 сылга Саха Өрөспүүбүлүкэтин 12-с ыҥырыылаах Үрдүкү Сэбиэтин быыбарыгар кыттан норуот дьокутаатын ылбыта. Бу өрөспүүбүлүкэҕэ бастакы демократия нуорматынан быыбардаммыт, сүбэринитиэт туһунан Дэкэлэрээссийэни ылыммыт, өрөспүүбүлүкэ Бастакы Бэрэсидьиэнин быыбарын тэрийбит күүстээх парламент этэ.
ххх
Саха Өрөспүүбүлүкэтин култууратын үтүөлээх үлэһитэ, СӨ бэчээтин туйгуна, суруналыыстыка эйгэтигэр В. В. Никифоров- Күлүмнүүр аатынан Судаарыстыбаннай бириэмийэ лауреата, суруналыыстар үгүс өрөспүүбүлүкэтээҕи, сонуннары киэҥник тарҕатар сириэстибэлэр норуоттар икки ардыларынааҕы бэстибээллэрин лауреата, түөрт Олимпийскай оонньуулары, икки Ыччат аан дойдутааҕы бэстибээллэрин таһаарыылаахтык сырдаппыт үтүөлээх киһибит Иван Петрович Ушницкай күн сириттэн күрэммитинэн кэргэнигэр, оҕолоругар, сиэннэригэр, бары билэр дьонугар дириҥ кутурҕаммытын тиэрдэбит.
ххх
Кини туһунан кэллиэгэлэрэ «Саха суруналыыстарын эйгэтин сулустаах халлааҥҥа холуу тутан көрөр эбит буоллахха, онно биир чаҕылхай, бэйэтэ ураты дьэргэлгэннээх, туспа тырымнаах сулуһунан Иван Ушницкай буолар...» диэн этэн турардаахтар.
Уйбаан Бөтүрүөбүс, быдан дьылларга быраһаай...
-
0
-
0
-
0
-
0
-
3
-
0
