Аҕа дойдуларын инники кирбиигэ көмүскээн кэлбит 600 чэкэ киһиттэн былырыын 25 кыттааччыны талбыттара. Сүүмэрдэммит дьон анал үөрэх кэнниттэн министиэристибэлэргэ, муниципальнай тэрээһиннэргэ, судаарыстыбаннай тэрилтэлэргэ стажировканы ааһаллар. Бырагыраама былырыыҥҥаттан үлэлээн, аны саас түмүктэниэхтээх, инникитин биир эрэ сиэссийэ хаалла.
Бырайыактары, бастатан туран, дьоҥҥо туһалаах буоллун диэн санаанан салайтаран, Ил Дархан, СӨ Бырабыыталыстыбатын сакааһынан бэлэмнээтилэр.
Нэһилиэнньэ олоҕун хаачыстыбатын тупсарарга, ыччаты дойдуга бэриниилээх буолууга иитиигэ, хоту улуустары эдэр үлэһиттэринэн хааччыйыы, тулаайах оҕолору олоххо бэлэмнээх буолууга уһуйуу о.д.а. хайысханан кыттааччылар бырайыактарын кэпсээтилэр. Кинилэр үлэлэрин Ил Түмэн вице-спикерэ, байыаннай сулууспалаахтарга, байыаннай дьайыы бэтэрээннэригэр, дойдуга бэриниилээх буолууга иитии уонна уопсастыбаннай түмсүүлэр боппуруостарыгар сис кэмитиэт бэрэссэдээтэлэ Александр Подголов, Ил Түмэн вице-спикерэ, судаарыстыбаннай тутууга уонна сокуону таһаарыыга сис кэмитиэт бэрэссэдээтэлэ Афанасий Владимиров, норуот дьокутаата, «Сахатранснефтегаз» АУо генеральнай дириэктэрэ Алексей Колодезников о.д.а. көрдүлэр-иһиттилэр. Ону таһынан, дьокутааттар настаабынньык быһыытынан курсаннары кытта үлэлэһэллэр, араас боппуруостарга сүбэ-ама буолаллар.
Ил Дархан уонна бырабыыталыстыба дьаһалтатын салайааччыта Георгий Михайлов: «Бу ураты суолталаах дьоһун бырагыраама, кыттааччылар элбэх тургутугу аастылар. Түмүктүүр биэтэккэ чугаһаан истэхпит аайы сотору кэминэн ким ханна үлэлии барара быһаарыллыа, бэйэҕитин хайдах көрдөрбүккүт көстүө. Талбыт тиэмэҕит өрөспүүбүлүкэ олохтоохторугар көдьүүстээх буоллун. Настаабынньыктарга махтаныахпын баҕарабын, кинилэр сөптөөх суолу ыйан-кэрдэн биэрэллэр», — диэн эттэ.
Салгыы «Саха Сирэ — дьоруойдар дойдулара» салайар каадырдары бэлэмниир бырагыраама 25 кыттыылаахтара сыанаҕа тахсан бырайыактарын көмүскээтилэр.
Ол туһунан сиһилии «Ил Түмэн» хаһыат кэлэр нүөмэригэр ааҕыҥ.
Ааптар хаартыскаҕа түһэриитэ.
-
0
-
0
-
0
-
0
-
0
-
0
