Ил Түмэн 2025 с. олунньу 26 күнүгэр тахсыбыт ГС 259-VII №-дээх СӨ ис дьыалаҕа уорганнарын 2024 с. үлэтин отчуотун туһунан уурааҕа хайдах толоруллубутун туһунан бырабыыталыстыба чааһыгар ити боппуруостары дьүүллэстилэр.
Санатан эттэххэ, дьокутааттар сыл ахсын ИДьМ миниистирин Владимир Прокопенко отчуотун истэллэр. Парламент вице-спикерэ, судаарыстыбаннай тутууга уонна сокуону таһаарыыга сис кэмитиэт бэрэссэдээтэлэ Афанасий Владимиров өрөспүүбүлүкэ министиэристибэлэрэ, биэдимистибэлэрэ наркотигынан эргиниини тохтоторго, нэһилиэнньэни кибер түөкүттэртэн сэрэтэргэ улахан үлэни ыыталлар диэн бэлиэтээтэ.
Ону таһынан, полицияҕа үлэһиттэр тиийбэттэрин хааччыйарга эдэр ыччат ортотугар бу идэ суолтатын сырдаттылар. Итиэннэ миграннар кэлиилэрин-барыыларын хонтуруолга туталлар. Дьокутааттар сис кэмитиэт, онтон кэлэр пленарнай мунньахха ИДьМ миниистирэ Владимир Прокопенко 2025 с. отчуотун истиэхтэрэ.
Ол иннинэ былырыын тахсыбыт уураах кэккэ пууннарыгар тохтоотулар. СӨ Бырабыыталыстыбатын бэрэссэдээтэлин солбуйааччы Анатолий Семенов куйаар ситимигэр буруйу оҥоруу элбээн, былырыын биэдэмистибэлэр икки ардыларыгар оробуочай бөлөх тэриллэн, бу хайысханан туох үлэ ыытыллыбытын туһунан иһитиннэрдэ.
Бастатан туран, видео, аудио, анимационнай роликтары оҥорон, сыыппара платформатыгар таһааран, нэһилиэнньэ ортотугар сэрэтэр үлэни ыыппыттар. Ону 20 000 тахса киһи көрбүт. Тэлэбиидэнньэҕэ 211, араадьыйаҕа 178 биэрии, 430 ролик тахсыбыт, СИА сонуннарын ыйга 3 мөл. киһи көрөр.
Дьон харчытын албыннаан ылар кибер түөкүттэри бопсорго аҥаардас сэрэтии эрэ үлэтэ ыытыллыбат. Сибээс оператордарын нөҥүө верификация оҥоһуллар, спам быһыытынан киирэр төлөпүөннэри блокировкалыыллар. Масыанньыктар эрийэллэр диэн үҥсүү киирдэҕинэ, ол төлөпүөн нүөмэрэ салгыы эрийэрин эмиэ тохтотоллор.
Саха Сирин разработчиктара «Аватек» хампаанньа гига-чат үлэлиир ассистеннаах мобильнай сыһыарыыны оҥорбуттар, ол тиэкиһи, ойууну, сыылканы көрөн баран толкуйдуур, ырытар, онтон сымыйа коду, логотибы булар эбит. Балаҕан ыйыттан бу сыһыарыыны 2000 тахса төгүл хачайдаабыттар, маны салгыы дьоҥҥо билиһиннэрэн иһиэхтэрэ.
Ол туһунан «Ил Түмэн» хаһыат кэлэр нүөмэригэр ааҕыҥ.
Василий Кононов хаартыскаҕа түһэриитэ.
-
0
-
0
-
0
-
0
-
0
-
0
