Эспиэртэр Ил Түмэн кыраасданнар официальнай саайтынан киллэрэр этиилэрин, туһаайыыларын кытары үрдүк таһымнаахтык үлэлиирин бэлиэтээбиттэр. Хардары сибээс хаачыстыбатын быһаарар инниттэн, чинчийээччилэр Арассыыйа Федерациятын субъектарын парламеннарыгар барыларыгар биир тэҥ ыйытыылары официальнай саайтарынан, электроннай буостанан ыыппыттар, төлөпүөнүнэн эрийэн эмиэ кэпсэппиттэр. Ол түмүгүнэн, Краснодар кыраайын уонна Саха Өрөспүүбүлүкэтин сокуону таһаарар уорганнара саайтынан киирэр туһаайыыларга болҕомтолоохтук сыһыаннаһаллара бэлиэтэммит.
«Парламент – ытыска» чинчийии төрдүс түһүмэҕэ 2023 сыл ортотуттан 2025 сыл ортотугар диэри кэми хабан ыытыллыбыт. Онно 85 эрэгийиэн парламенын үлэлэрэ-хамнастара төһө аһаҕастара алта сүрүн кэрискэнэн сыаналаммыт: быһаарыылары ылыыга, сокуоннары оҥорор үлэҕэ, хардары сибээскэ, социальнай тииһилэҥнээх буолууга, маассабай көрдөрөр-иһитиннэрэр сириэстибэлэргэ бэлитиичэскэй паартыйалар тэҥ буолуулара төһө мэктиэлэнэригэр итиэннэ парламент иһигэр аһаҕас буолууга.
Ааптардар ааҕан таһаарбыттарынан, сокуону оҥорооччуларга саамай киэҥник биллэр, туһаныллар платпуорманан «ВКонтакте» ситим (83 парламент), Telegram (68), «Одноклассники» (54) уонна Rutube (36) ханааллар эбиттэр. Чинчийии түмүгүнэн, лиидэрдэринэн Татарстаан Судаарыстыбаннай Сэбиэтэ, Забайкалье кыраайын Сокуону оҥорор мунньаҕа, Астрахань уобалаһын дуумата тахсыбыттар. Эрэгийиэннэр парламеннара аһаҕас буолууларын таһыма сыллата улаатан уонна судаарыстыба салалтатын ситимигэр оруоллара күүһүрэн иһэрин эспиэртэр бэлиэтээбиттэр.
«1870» пуонда бэрэсидьиэнэ Кирилл Страхов иһитиннэрбитинэн, чинчийии эрэгийиэн парламеннара судаарыстыба салалтатыгар ылар оруоллара үрдээн, быыбардааччыларыгар аһаҕас буолуулара улаатан иһэрин көрдөрбүт. Ол туһунан кини: «Эрэгийиэннэр парламеннара тустаах территорияларын уратытын учуоттааннар уонна кырасдааныскай уопсастыба интэриэһинэн салайтараннар, сокуонунан сүрүннээһин тупсаҕай, табыгастаах, имигэс буолуутун хааччыйаллар», – диэбит. Ил Түмэн быыбардааччыларын кытары сибээһин үрдүктүк сыаналааһын Саха парламена өрөспүүбүлүкэ олохтоохторугар аһаҕас уонна тииһилэҥнээх буоларга дьулуһан үлэлиирин кэрэһилиир. Кыраасданнар этиилэригэр, туһаайыыларыгар көдьүүстээхтик үлэлээһин уопсастыбаннай хонтуруол сүрүн ырычааҕа буолар уонна сокуону оҥоруу үлэтин хаачыстыбатын үрдэтэр. Бу туһунан Ил Түмэн пресс-сулууспата суруйар.
Хаартыска: Ил Түмэн саайтыттан.
-
0
-
0
-
0
-
0
-
0
-
0
