Уопсастыба

Ааспыт сыл түмүгүнэн Саха Сиригэр регистрацияламмыт буруйу оҥоруу 8% үрдээбит, ол иһигэр айти хайысханан дьону албыннааһын тэнийэ турара киһини дьиксиннэрэр, бу салааҕа буруйу оҥоруу 39,5% эбиллибит. Ол эрэн баан каартатыттан харчыны уоруу 20,5% кыччаабыт, оттон полиция үлэһиттэрэ айти хайысханан наркотигы тарҕатыыны тохтотоллоро элбээбит.

Киһини өлөрүү, ыараханнык эчэтии, уоруу эмиэ аҕыйаабыт эрээри, 53,1% күүһүлээһин эбиллибит.

Буруйу оҥоруу чуолаан Ньурба, Бүлүү, Таатта улуустарыгар үрдээбит, хоту улуустарга ити көрдөрүү кыччаабыт.

Уһук Илин өрөспүүбүлүкэ буруйу оҥорууга үһүс миэстэни ылар. Сокуоннай саастарын ситэ илик оҕолор буруйу оҥоруулара 42,4% үрдээбит, саҥа улаатан эрэр оҕолор күүһүлээһиҥҥэ, маҕаһыынтан, дьиэттэн, ыскылааттан уорууга, массыынаны күрэтиигэ кытталлара бэлиэтэммит. Улахан кылаас үөрэнээччилэрэ саамай элбэх буруйу Хаҥалас, Бүлүү, Булуҥ о.д.а. улууска, Дьокуускай куоракка оҥороллор эбит.

Видеонан кэтээн көрүү түмүгүнэн 330 административнай быраабы кэһии бэлиэтэммит, 125 буруйу оҥоруу аһыллыбыт. Суол быраабылатын кэһиини бэлиэтиир тэрил көмөтүнэн 2025 с. 569 мөл. солк. суумалаах 530 379 административнай быраабы кэһии сурукка киирбит. Онтон 418 мөл. солк. ирдэһэн ылбыттар. 25% чэпчэтиилээх 86 мөл. солк. ыстараап төлөммүт.

СӨ Ис дьыалаҕа миниистирин солбуйааччытын дуоһунаһын быстах кэмҥэ толорооччу Юрий Тищенко күн бүгүн полиция эбийиэктэрин дьиэлэрэ эргэрбиттэрин-эмэҕирбиттэрин, аныгы ирдэбилгэ эппиэттээбэттэрин, изоляторга миэстэ тиийбэтиттэн дьону чугастааҕы улуустар ИВС-тарыгар тиэрдэллэрин туһунан иһитиннэрдэ. Спецприемник дьиэтин хапытаалынай өрөмүөнүгэр үп-харчы көрүллэрэ наадатын тириэртэ.

Кини дакылаатын түмүктүүрүгэр буруйу оҥоруу үксэ итирдэр утаҕы иһэн баран өйдөспөт буолууттан тахсарын, күүс көмөтүнэн быһаарсыыга дьон эчэйэрин санатта. Харчыга ымсыы дьон киэһэ, түүн кыраадыстаах утаҕы остуол аннынан кистээн атыылыылларын эттэ. Онон итинниккэ түбэспит урбаанньыттар лиссиэнсийэлэрин былдьыырга этии киллэрдэ. Өрөспүүбүлүкэҕэ буруйу оҥоруу, бэрээдэги кэһии туругун туһунан дириҥ ис хоһоонноох дакылааты истэн баран норуот дьокутааттара 25 ыйытыгы биэрдилэр.

Ол туһунан сиһилии "Ил Түмэн" хаһыат кэлэр нүөмэригэр ааҕыҥ. 

Василий Кононов хаартыскаҕа түһэриитэ.