Өйдөбүнньүк тэрээһиҥҥэ норуот дьокутааттарын тэҥэ Афганистаҥҥа сулууспалаабыт интернационалист буойуттар, байыаннай дьайыы бэтэрээннэрэ, анал байыаннай дьайыы кыттыылаахтара, кинилэр дьиэ кэргэттэрэ, «Арассыыйа патриоттара», «Юнармия», «Норуодунай боруон» хамсааһыннар актыбыыстара кытыннылар.
Ол курдук, норуот дьокутаата, Норуодунай боруон Саха Өрөспүүбүлүкэтинээҕи эрэгийиэннээҕи салаатын салайааччыта Дмитрий Паньков бэлиэтээбитинэн, ССРС уонна РФ байыаннайдара уопсайа 30 туочукаҕа Ийэ дойдубут интэриэһин көмүскээбиттэрэ. Биир дойдулаахтарбытын чиэстээһин кэмигэр ытык иэстэрин төлүү сылдьан тыыннарын толук биэрбит буойуттары ахтан-санаан, кэриэстээн аастылар.
Афганистан сэриитин бэтэрээнэ Валерий Лютый 37 сыл анараа өттүгэр олунньу 15 күнүгэр сэбиэскэй сэбилэниилээх күүстэр бу дойдуттан таһаарыллалларыгар биһиги буойуттарбыт төбөлөрүн өрө көтөҕөн, былаахтарын күөрэччи туппутунан тахсыбыттара, оттон аҕыйах сыллааҕыта американецтар хайдах курдук сааттаахтык куоппуттарын бары көрөн, итэҕэйэн турабыт диэн холобурдаан, устуоруйа уруогун сыаналыырга ыҥырда. Кини Сэбиэскэй Сойуус Афганистаҥҥа балыыһалары, оскуолалары туппутун, быраастары, учууталлары үөрэппитин санатта уонна билигин душманнар интренациональнай иэстэрин төлөөбүт афганец-бэтэрээннэри пловунан көрсөллөрүн кэпсээтэ.
«Анал байыаннай дьайыы буойуттарын Өйдөбүнньүгэ» Саха Сирин дьиэ кэргэттэрин Сойууһун бэрэссэдээтэлэ Жанна Грекова тыл этиитигэр АБДь охтубут, сураҕа суох сүппүт буойуттар төрөппүттэрин, дьиэ кэргэттэрин түмэр уопсастыбаннай тэрилтэ үлэтин, туох тэрээһиннэр ыытыллалларын, көмө, өйөбүл оҥоһулларын туһунан билиһиннэрдэ.
Түмүккэ Ил Түмэн бэрэссэдээтэлин бастакы собуйааччы, судаарыстыбаннай тутулга уонна сокуону оҥорууга сис кэмитиэт бэрэссэдээтэлэ Афанасий Владимиров бойобуой дьайыылар бэтэрээннэригэр наҕараадалары туттарда.
Хаартыскалар: Василий Кононов, Ил Түмэн.
82.rosguard.gov.ru
-
1
-
0
-
0
-
0
-
0
-
0
