Алена Атласова арыгы атыытыттан аккаастаммыт, чөл олоҕу тутуһар нэһилиэктэри өйүүргэ, олорор сирдэрин тупсаралларыгар гыраан биэрэргэ туох үлэ ыытылларын интэриэһиргээтэ.
СӨ Үбүн министиэристибэтин бэрэстэбиитэлэ куонкурус түмүгүнэн олохтоохтор көҕүлээһиннэрин өйүүр бырагыраамаҕа ППМИ үбүлээһин көрүллэрин, улуустар үс бөлөххө арахсалларын, киирбит бырайыактары сыаналыырга чөл олоҕу тутуһар нэһилиэктэри туһунан көрбөттөрүн эттэ. Баалы туруоралларыгар бырайыагы бэйэтин сыаналыылларын быһааран биэрдэ.
Алена Атласова урукку өртүгэр чөл олоҕу тутуһар нэһилиэктэри өйүүллэрин, саҥа эбийиэги туталларыгар үп-харчы көрөллөрүн, ол уопуту сөргүтэр наадалааҕын туһунан санаатын үллэһиннэ. Кини Уһук Илин үрдүнэн Чукоткаҕа арыгыны иһии көрдөрүүтэ саамай намыһаҕа тугу кытта сибээстээҕин, эбэтэр кыраадыстаах утаҕы онно аҕалбат буоланнар итинник көрдөрүүлээхтэрин туоһуласта. Максим Карбушев Чукоткалар уопуттара үөрэтиллэ илигин туһунан хардарда.
Алена Николаевна арыгыттан өлүү көрдөрүүтэ Аллайыаха улууһугар саамай үрдүк, ол аата кинилэргэ кыраадыстаах утах тиийбэт, дьон түбэһиэх суррогаты иһэллэр дуо диэн ыйыталаста. СӨ Доруобуйаҕа харыстабылын миниистирин солбуйааччы Любовь Бурнашева ити сыыппараҕа арыгыттан сүһүрүү эрэ буолбакка ол содулуттан (циррозтан, тымыр-сүрэх үлэтин кэһиллиититтэн) барбыт дьон ахсаана киирэрин туһунан хоруйдаата.
Мунньахха кэлбит дьон хоту улуустарга саахары аҕалбатахтар диэн үҥсүбүттэрин бэрэбиэркэлээбиттэрэ саахар толору кээмэйин тиэрдибиттэрэ биллибит, арай ону самогон оҥостоору барытын сотон ылбыттарын аҕыннылар. Самогон статистикаҕа оччотугар киирсибэт дуо дэстилэр.
Василий Кононов хаартыскаҕа түһэриитэ.
-
0
-
0
-
0
-
0
-
0
-
0
