Уопсай Мунньах Уһук Илин эрэгийиэннэрин сокуону оҥорор судаарыстыбаннай былааһын бэрэстэбиитэллэрэ федеральнай былааска кыттыгас этиилэрин киллэриэхтэрэ. Ол курдук көрсүһүүгэ биир сүрүн кыһалҕаны - электроэниэргийэ ситимигэр үөскээбит боппуруостары көрөллэр. Сүрүннээн Уһук Илин эрэгийиэннэригэр уот тарыыбын ноҕуруускатын ырыталлар.
Саха Сирин парламенын салайаачыта Алексей Еремеев бу мунньахха таһаарыллыбыт сүрүн боппуруоһунан -электроэниэргийэ тарыыбынан сүрүн иһитинэриини оҥордо.
-Санатар буоллахха, 2024 сыл балаҕан ыйыгар Благовещенскайга ыытыллыбыт Ассоциация уочараттаах Уопсай мунньаҕар Уһук Хоту тыйыс усулуобуйатыгар электроэниэргийэ ырыынактааҕы тарыыба олус үрдүгүнэн бу боппуруоһу федеральнай былаас уорганнарыгар туруорсуу наадалаах диэн этии киллэрбиппит. Онтон 2025 сыллааҕы маннык көрсүһүүгэ биһиги өрөспүүбүлүкэбитигэр тарыып боппуруоһа сүрүн суолталааҕын эбии санатан туруорсубуппут. Ол курдук биһиги 2028 сыллаахха Уһук Илин эрэгийиэннэрин экэнэмиичэскэй өртүнэн сөптөөх тарыыпка көһөрүүнү үчүгэйдик үөрэтэн көрөрбүт наада. Бу былаан олоххо киллэриллэр түбэлтэтигэр тарыыптар араастаһыыларын сабар субсидиялааһын мэхэньиисимэ тохтуохтаах . Эрэгийиэннэр бүддьүөттэрэ итинник уларытыыга бэлэмнэрэ суох. Ол иһин, бу РФ Бырабыыталыстыбатыгар субсидиялааһын мэхэньиисимин уһатарга анал кэлим комплекснай быһаарыыны оҥорорго Ыҥырыы таһааран, салгыы РФ Бырабыыталыстыбатын көрүүтүгэр киллэрэн, сөптөөх быһаарыыны ылыналларын туруорсарбыт, -диэн этии киллэрдэ.
Ассоциация чилиэннэрэ Саха Сирин парламенынан аатыттан Алексей Ильич киллэрбит этиитин өйөөтүлэр.
А.И. Еремеев олунньу 21-23 Соҕуруулуу Сахалинскайга ыытыллыбыт парламеннар Ассоциацияларын Уопсай Мунньаҕар кыттыытын туһунан «Ил Түмэн» хаһыат олунньу 27 күнүнээҕи нүөмэригэр тахсыаҕа.
Хаартыскалар Ил Түмэн пресс-сулууспатыттан
-
2
-
0
-
0
-
0
-
0
-
0
