-Икки сыл анараа өртүгэр 2023 с. балаҕан ыйын 10 күнүгэр дьон миэхэ итэҕэйэн, норуот дьокутаатынан талбыттара. Бу кэм устата Дьокуускай куорат Даркылаах уокурун олоҕун тупсарарга, уустук боппуруостары быһаарарга күүрээннээх, тыҥааһыннаах, суолталаах үлэ ыытылынна. Мин сүрүн бириинсибим диэн дьоҥҥо аһаҕас буолабын, ыйытыы киирдэҕинэ эппиэтэ уонна болҕомтото суох хаалларбаппын.
Ол иһин олохтоохтору кытта куруук көрсөбүн, кыһалҕалаах дьон кэллэҕинэ дьокутаат быһыытынан тустаах тэрилтэлэргэ сурук ыытабын, ол түмүгүнэн туох миэрэ ылалларын хонтуруоллуубун. Нэһилиэнньэни Ил Түмэн дьиэтигэр, «Биир ньыгыл Арассыыйа» баартыйа бэрэссэдээтэлэ Д.А. Медведев эрэгийиэннээҕи уопсастыбаннай приемнайыгар, олорор сирдэригэр да тиийэн көрсөбүн. Дьон дьиэ-уот, хомунаалынай хаһаайыстыба о.д.а. кыһалҕатыгар ыктаран кэлэр, биллэн турар, баар кыһалҕаны биир күн иһигэр быһааран кэбиспэккин, ол эрэн кинилэр кыһалҕаларын болҕомтото суох хаалларбаппын.
Аҕа дойдуну көмүскээччилэр күннэрэ чугаһаан эрэр, бу эр санаа, хорсун быһыы, төрөөбүт дойдуга бэриниилээх буолуу бэлиэ күнэ. Кыргыһыы уоттаах хонуутугар Аҕа дойдуну көмүскүүр сэриигэ дойдуларын көмүскээбит көлүөнэҕэ, локальнай иирсээн бэтэрээннэригэр сүгүрүйэбит. Анал байыаннай дьайыыга дьоруойдуу хорсун быһыыны көрдөрбүт уолаттарбытынан киэн туттабыт.
Биһиги сис кэмитиэппит үлэтэ — социальнай мэктиэ, мэдиссиинэ өртүнэн хааччыллыы боппуруостарын быһаарыы, байыаннай сулууспалаах дьоҥҥо, бэтэрээннэргэ, кинилэр дьиэ кэргэттэригэр дьиэ буларга көмөлөһүү. Дойдутун көмүскээбит киһи өйөбүллээх буолуохтаах. Кини кыһалҕатын быһаарыы — биһиги үлэбит сүрүн сүнньэ диэн этиэххэ сөп.
Дойдуга бэриниилээх буолуу абстрактнай өйдөбүл буолбакка тыыннаах күүс. Бу иитииттэн тутулуктаах. Ол иһин юнармейскай хамсааһыны, бэтэрээннэр түмсүүлэрин, көрдүүр-ирдэһэр этэрээттэри, байыаннай-историческай кулууптары өйүүргэ болҕомтобутун уурабыт.
Аҕа дойдуну көмүскээччи өйдөбүлэ байыаннай сулууспанан эрэ муҥурдаммат. Инновационнай обороннай-бырамыысыланнай үлэ, дьон доруобуйатын тупсарыы, киһи киэн туттар дьонун иитэн таһаарыы, экэниэмикэни сайыннарыы бу барыта Арассыыйа инники олоҕун тутарга тирэх буолар.
Ис сүрэхтэн кэлэн иһэр бырааһынньыгынан байыаннай сулууспалаах дьону, бэтэрээннэри, бэрээдэги араҥаччылыыр үлэһиттэри, дьиэ кэргэнин, дьиэтин, дойдутун көмүскүүр дьону барыларын эҕэрдэлиибин!
Чэгиэн доруобуйаны, табыллыыны, эйэлээх ыраас халлааны баҕарабын! Арассыыйа күүһэ — сомоҕолоһууга, дойдуну көмүскүүр көлүөнэ бэйэ-бэйэтин солбуйан иһиэхтээх, ити кэм-кэрдии ирдэбилэ.
Хаартыска сис кэмитиэт архыыбыттан, Василий Кононов түһэриитэ.
-
0
-
0
-
0
-
0
-
0
-
0
