Начаас ыккардыгар ып-ыраас обуой устун хап-хара сурааһыннар харах уутунуу халыстылар, линолеум анна бардырҕас уу буолла. 56-с кыбартыыра хаһаайката Ольга Зарубина Томскай куоракка көспүт, онон дьиэтэ кураанах турар. Дружба народов уулусса 13 №-дээх дьиэтигэр батарыайалар тоҕу барыылара сонун кэпсэл буолбатах, бу дьиэ фундамена хамсаан, итинник түбэлтэлэр тахсаллар уонна ортоку подъеһынан истиэнэ хайдан эрэр эбит. «Кыһалҕа кыһыл талах кымньыылаах» диэн өбүгэ өһө баар, онон, тустаахтар тула сүүрэ сатаан баран, Ил Түмэн дьокутаата Николай Ноттосовка сурук ыыттылар. Онуоха норуот дьокутаата тустаах тэрилтэни, олохтоох дьаһалтаны кытары кэпсэтэн, дьиэни хаарбах туруктаах диэн ыстаатыска киллэттэрэн, олохтоохтору атын, кураанах турар кыбартыыраларга көһүөххүт диэн эрэннэрэн олус үөртэ, кынаттаата, самнан хаалбыт санааларын сайҕаан үрдүккэ, сырдыкка өрө көтүттэ. Олохтоохтор ону истэн, ис истэриттэн үөрэн, ытыктабыллаах күндү-мааны дьокутааттарыгар Николай Макарович Ноттосовка сылаас, истиҥ махталларын ыыталлар.
Үрүҥ көмүс мөһүүрэни
Үрдүк халлаан ыспахтыыр,
Үрүлүйэр кэрэни
Үлүмнэһэ куппахтыыр.
Дьиэрэҥкэйдиир үөрүүлэр
Дьэрэлиһэ ойоллор,
Дьэрэкээннээх иэйиилэр
Дьиримнэһэ оонньууллар.
Светлай бүгүн күннүүр!
Үөрүү-көтүү үрдүүр!
Тулабыт барыта сандалас!
Харахтар уоттара тырымнас!
Ытыктабыллаах Николай Макарович, эйигин Аҕа дойдуну көмүскээччи күнүнэн итиитик-истиҥник эҕэрдэлиибит, үлэҕэр ситиһиилэри баҕарабыт. Эн тускар Айыыһыттаах сандал маҥан халлаан алын кырыыта алгыһынан арылыйдын, Иэйэхситтээх истиҥ тыыннаах илин халлаан ичигэһинэн илгийдин! Хаамар сириҥ хаамыылаах ат харытыгар хатаастар хампа ньаассын отунан хамсыы силигийдин, үктэнэр сириҥ үүс кыраһатын курдук үчүгэй сибэккинэн үлүмнүү үүннүн!
Туску туһаайдын! Саргы салалыннын! Дьол тосхойдун!
Александра ГРИГОРЬЕВА -- Сандаарыйа, суруйааччы.
-
1
-
0
-
0
-
0
-
0
-
1
