СӨ Бырамыысыланнаска уонна геологияҕа миниистирин бастакы солбуйааччыта Михаил Кириллин иһитиннэрбитинэн Саха Сиригэр социальнай гаастааһын бырагырааматынан 2021 с. бэттэх 10 000 дьиэни холбоотулар. Мэҥэ Хаҥаласка гаас турбата Сымах уонна Лоомтука нэһилиэктэригэр киирдэ. Ону таһынан, Ленскэй улууһун Бэчэнчэ, Мурья, Батамай нэһилиэгэр, Нерюнгри оройуонун Иенгратыгар гаас ситимэ тардылынна. 2030 с. диэри 29 нэһилиэккэ гаас киириэхтээх.
Ил Түмэн сир сыһыаннаһыыларыгар, айылҕа баайыгар уонна экология сис кэмитиэтин бэрэссэдээтэлэ Андрей Находкин илин эҥэр улуустарыгар, Мэҥэ Хаҥалас Хорообут, Нуораҕана нэһилиэктэригэр гаас ситимин киллэрии хайдах быһаарыллан иһэрин туһунан ыйыталаста.
Миниистир бастакы солбуйааччыта Михаил Кириллин Мэҥэ Хаҥаласка былырыын Сымах, Лоомтука нэһилиэктэригэр гаас турбата тардыллыбытын, быйыл Хорообукка гааһы киллэрэргэ судаарыстыбаннай эспэртиисэни ааспыттарын туһунан эттэ. Инникитин Чурапчы улууһугар Уһун Күөлгэ гаас киириэхтээх, Хаҥалас улууһугар Хачыкаакка убатыллыбыт айылҕа гааһын туттуохтаахтар. Бу эбийиэктэр күн бүгүн өрөспүүбүлүкэ бүддьүөтүгэр киирэ иликтэр эрээри, уларытыылары киллэрэргэ туруорсуохпут диэтэ кини.
Норуот дьокутаата, "Якутцемент" ААУо генеральнай дириэктэрэ Алиш Мамедов өрөспүүбүлүкэ нэһилиэктэрин гааһынан хааччыйарга Уһук Илин иккис миэстэҕэ турабыт диэни истэн, эдэр сылдьан ыарахан ыйааһыҥҥа тустууга улууска икки эрэ киһи баар буолан, иккис миэстэни ылбытын туһунан эттэ. Саха Сирин нэһилиэктэригэр күн бүгүн гаас турбатын тардыы бытаанын, мөлтөҕүн бэлиэтээн туран, Хаҥалас Хачыкаатыгар убатыллыбыт айылҕа гааһыгар төһө үп көрүллүбүтүн, үлэни ханнык тэрилтэ оҥорон, хаһан туттарарын туһунан туоһуласта. Оттон бүтүн гаас турбата 60 км. сиргэ Хаптаҕайга аттыларыгар баарын санатта.
Онуоха Михаил Кириллин бөһүөлэк иһигэр гаас ситимин тутарга 113 мөл. солк. суумалаах үлэ оҥоһуллубутун, таҥар үлэни ыытарга, убатыллыбыт гааһы харайарга 300 мөл. солкуобайдаах бырайыак эспэртиисэни ааһан, үбүлэниэхтээҕин чуолкайдаата.
Василий Кононов хаартыскаҕа түһэриитэ.
-
0
-
0
-
0
-
0
-
0
-
0
