2026 сылга сүрүн сорук быһыытынан, нэһилиэнньэ уопсай ахсааныгар 3 сааһыттан 79 сааһыгар диэри физическэй култууранан уонна успуордунан утумнаахтык дьарыктанар нэһилиэнньэ ахсаанын 64,74 бырыһыаҥҥа диэри улаатыннарыахтаахтар.
Ол түмүгэр физическэй култууранан уонна успуордунан дьарыктанарга тэриллэр усулуобуйаны үчүгэйинэн сыаналыыр дьон ахсаана 66 бырыһыаҥҥа тиийиэхтээх.
Маны таһынан, успуорт араас көрүҥнэринэн дойду сүүмэрдэммит хамаандаларын састаабыгар өрөспүүбүлүкэ спортсменнара киирэллэрин ситиһиэхтээхтэр.
“Земскэй тириэнньэр” федеральнай бырагыраама салгыы үлэлээн, 2026 сылга – 18 тириэнньэри кытта дуогабардаһан, тыа сиригэр, эбэтэр дьоҕус куоракка үлэлэтэ, успуорду сайыннара ыытыахтаахтар. Кинилэр биирдии бэйэлэрэ 2 мөл. солк. биир кэмнээх көмөнү ылыахтара.
Успуорт инфраструктуратын сайыннарарга ГТО туттарарга аналлаах успуорт технологическай тэрилинэн хааччыйыахтара.
Быраастар аныгы киһи, оҕо-аймах көмпүүтэргэ бүк түһэн олорор, төлөпүөнүн тутан олорон утуйар уонна уһуктар, ол иһин харахтара эрдэ мөлтөөтө, систэрин тоноҕоһо ыалдьар, хондуруос үөскүүр, онтон сылтаан хаан баттааһына үрдүүр-түһэр диэн этэллэр. Ону таһынан, үгүс киһи элбэҕи аһыыр уонна хамсаммат, итинтэн сылтаан этиргэн оҕо элбээтэ, эдэр дьон отуттарын аастылар да ортолорунан уойаллар, ыйааһыныҥ нуорматтан таҕыстаҕына, сүрэххэ, хаан баттааһыныгар, сүһүөххэ ноҕурууска биэрэр дииллэр. Ол иһин күҥҥэ саатар биир чаас тиритэ-хорута хамсанан, успуордунан дьарыктанан, оптуобус оннугар дьиэбитигэр сэниэлээхтик хааман ордук калорийы «уматан» иһиэхтээхпит.
Хаартыска СИА.
-
0
-
0
-
0
-
0
-
0
-
0
