Киинэни Хаҥалас, Амма, Горнай улууһугар уонна сытыы тииһин килэппит адьырҕа кыылы, тыыннаах тыатааҕыны ат курдук мииннэ сылдьан Подмосковьеҕа уһуллулар.
«Лена» киинэ тыйаатырын сыанатыгар устар бөлөх, киинэҕэ уһуллубут оҕолор, артыыстар тахсан бэйэлэрин билиһиннэрдилэр, көрөөччүлэр ыйытыктарыгар хоруйдаатылар.
Сүрүн дьоруой Мишутка (Дамир Дьяконов) киһи эрэ таптыах төп-төгүрүк, бөп-бөкүнүк оҕо төрөөбүт күнүгэр дьоно ыт оҕотун бэлэхтээбиттэригэр кыыһыран буугунуур, плейстейшн ханна баарый? диэн кыҥкыйдыыр. Ону истэн эһэтэ айылҕаны кытта алтыһыннара, үүтээҥҥэ дьиҥнээх эр киһини иитэ илдьэ барар.
Уол күнү супту ноутбукка оонньуу олорор, ол быыһыгар пиццатын мотуйар, кока-кола иһэр. Эһэтэ сиэнин кытта кэпсэтэ сатыыр даҕаны, күчүмэйҕэйдэри көрсөр, көмпүүтэргэ умса түһэн олорор оҕо аанньа кэпсэппэт. «Розетка тоҕо суоҕуй, ноутбукпун иитиэм этэ, манна киһи тэһийбэт, чуҥкук дойду, дьиэбэр барыахпын баҕарабын” — диэн сирэр-талар. Эһэтэ ачаах маһынан (рогатканан) ытарга үөрэтэ сатыырын «акаары баҕайы», — диир. Аҕа саастаах уонна эдэр көлүөнэ бэйэ-бэйэлэрин өйдөспөттөрө, тус-туһунан интэриэстээхтэрэ көстөр.
Онтон уол ойуурга куотан хаалбыт ытын эккирэтэ сылдьан мунан хаалар, арай көрбүтэ халыҥ тыа быыһыттан мап-маҥан мап-мааны таба кылбайан, көмүс муоһа дьүкээбил уотунан күлүмүрдээн, тулатын сырдыгынан сыдьаайан тахсан кэлэр. Уол соһуйан тиэрэ кэлэн түһэр, онуоха: «Айка, киһини өлөрөөрү гынныҥ, лэппэччи үктээтиҥ», — диэн ким эрэ кыыһырар, көрбүтэ хомурдуос саҥарар. Салгыы батыһа сылдьар ытын, мэкчиргэ, маска баттата сытар саһыл оҕотун саҥатын барытын истэр, өйдүүр буолар. Халыҥ харчыны эккирэтэн, табаны бултуу кэлбит дьону Мэхээлэчээн эһэтин кытта тохтотоору, ийэ айылҕаны харыстаары киһи эрэ астына-дуоһуйа көрөр мүлчүргэннээх сырыытыгар түбэһэллэр... Ону таһынан, киһи айылҕа оҕото буоларын быһыытынан, тулалыыр эйгэҕэ харыстабыллаах сыһыаннаах буолуохтаах диэн үөрэтэр.
«Мэхээлэчээн булчут» киинэ улахан экраҥҥа кулун тутар 19 күнүттэн икки тылынан тахсыаҕа.
Ааптар хаартыскаҕа түһэриитэ.
-
0
-
0
-
0
-
0
-
0
-
0
