Үлэ Дьоруойун Ил Түмэн бэрэссэдээтэлин бастакы солбуйааччы Александр Жирков эдэрдэр Михаил Николаевичтан элбэххэ үөрэнэллэрин, доҕотторо ытыктыылларын уонна бүтүн Саха Сирин дьоно-сэргэтэ кининэн киэн туттарын бэлиэтээтэ.
СӨ бырабыыталыстыбатын бэрэссэдээтэлин солбуйааччы Сергей Местников эҕэрдэлээн: «Дьоруой бүгүн даҕаны илиитин үлэттэн араарбат, кини «Удьуор» бааһынай хаһаайыстыбаны салайа сылдьар. Бу — биһиги Дьоруойбут үлэҕэ бэриниилээҕин көрдөрөр. Кини киллэрбит саҥа көрүүлэрэ, уопута бүтүн өрөспүүбүлүкэҕэ тарҕанар. Өссө да көмө, сүбэ буола сырыт!» — диэтэ уонна «СӨ үтүөлээх үлэһитэ» бэлиэни туттарда.
Салгыы СӨ тыатын хаһаайыстыбатын уонна ас-үөл бэлиитикэтин миниистирэ Артем Александров үлэтинэн-хамнаһынан ыччакка холобур буола сылдьар Дьоруой Михаил Готовцевы эҕэрдэлэтэ итиэннэ СӨ агропромышленнай комплексын сайдыытыгар кылаатын иһин «Бочуоттаах наставник» бэлиэни туттарда. Салгыы дьоруойу Саха Сиригэр биллэр дьон Павел Шарин, Дмитрий Наумов Дьоруой туһунан истиҥ тыллаах ахтыылары оҥордулар, үбүлүөйүнэн эҕэрдэлээтилэр.
Уус Алдан улууһун дьаһалтатын баһылыга Василий Алексеев эҕэрдэтин тэҥэ килбиэннээх үлэтин иһин Уус Алдан улууһун бочуоттаах бэлиэтин туттарда. Баһылык Дьоруойу кытта тэҥҥэ үлэлии сылдьар балтытыгар Анастасия Готовцеваҕа үтүө суобастаах үлэтин иһин «Уус Алдан улууһун Бочуоттаах олохтооҕо» ааты иҥэрдэ.
Сүөһү иитиитигэр уонна тыа хаһаайыстыбатын сайдыытыгар олоҕун анаабыт, үлэттэн илиитин араарбатах киэн туттар Дьоруойбут Михаил Готовцев: «Мин 60-ча сыл устата биир күн өрөөбөккө үлэлээн кэллим. Ийэм ыанньыксыт этэ, кини курдук ыанньыксыт буолуом диэн баҕа санаалаах улааппытым. Үөскээбит Убаһалаах алааспар күн бүгүнүгэр диэри олоробун. Мин биир таммах көлөһүммүн атын сиргэ үлэлээн тохпотоҕум. Танда туһугар үлэлээтим. Ыччаттарга туһаайан этиэм этэ — төрөөбүт дойдугутугар үлэлээҥ, сайыннарыҥ», — диэн этиитинэн үөрүүлээх тэрээһин түмүктэннэ.
ххх
Михаил Николаевич 1946 сыллаахха Уус Алдан улууһун Танда бөһүөлэгэр күн сирин көрбүтэ. Эдэр сааһыттан Дьоруой Егоров аатынан совхоз «Мечта» ферматыгар үлэлээн, 1984 сыллаахха муҥутуур кирбиини ситиспитэ. Биир ынахтан 5305 киилэ үүтү ыан, чаҕылхай холобур буолбута. Маны таһынан, сүөһү боруодатын тупсарыыга үгүс сыратын анаабыта, билигин 80 сааһыгар сырыттар даҕаны, Танда бөһүөлэгэр «Удьуор» бааһынай хаһаайыстыбатын сүрүннүүр, улахан уопутун эдэр үлэһиттэргэ тарҕатар.
Хаартыска ЯСИА
-
3
-
0
-
0
-
0
-
0
-
0
