Өрөспүүбүлүкэҕэ 60-чаларын ааспыт дьон ахсаана 151 000 тахса, онтон 90-чаларын ааспыт аарыма кырдьаҕастар 1500 куоһараллар, 19 ытык кырдьаҕас 100-тэрин бэлиэтээбиттэрэ. Айсен Николаев көҕүлээһининэн сүүс саастарыгар тиийбит дьон биирдии мөлүйүөн биир кэмнээх төлөбүрү ылаллар, онон дьон олоххо тардыһыыта күүһүрдэ.
Статистиканы көрдөххө, олохтон туорааһын сүрүн төрүөтэ тымыр, сүрэх, хаан эргиирин үлэтин кэһиллиитэ, искэн ыарыыта, суолга саахалтан эчэйии. Ону таһынан, дьон үгүстүк тыынар, ас буһарар уоргана ыалдьар.
Ол иһин сүрэх-тымыр, искэн ыарыыларын эрдэ булан эмтииргэ, үрдүкү технологиялаах мэдиссиинэ көмөтүн оҥорорго өрөспүүбүлүкэҕэ Уһук Илин үрдүнэн доруобуйа харыстабылын улахан эбийиэктэрэ 2022 с. кардиососудистай киин, 2024 с. саҥа онкологическай диспансер тутуллан үлэҕэ киирбиттэрэ.
Былырыын Дьокуускай куоракка 2 №-дээх балыыһа инновационнай SMART-поликлиниката аһылынна. Доруобуйа харыстабылын 13 эбийиэгэ, ол иһигэр биэс биэлсэр-акушер киинэ, быраас амбулаторията үлэлээтэ. Нерюнгритааҕы балыыһа эмтиир куорпуһун хапытаалынай өрөмүөнэ уонна дьахтар консультациятын дьиэтин тутуу түмүктэннэ.
Өлүөхүмэҕэ уонна Дьокуускай 3 №-дээх балыыһатыгар амбулатория таһымыгар гериатрическай кабинеттар кырдьаҕастары көрөр буоллулар.
Мэдиссиинэҕэ саҥа технология киирэн, дьоҕус эчэйиилээх оҥоһуллар эпэрээссийэ ахсаана кэҥэтилиннэ, ол ыарыһах хирургическай орооһууну чэпчэкитик аһарынарыгар уонна чөлгө түһэрии кэмин кыччатыыга тирэх буолар. Аныгы чинчийии түмүгэр, искэн ыарыытын 45,7 тахса бырыһыана эрдэ быһаарыллар кыахтанна, төһөнөн эрдэ мэдиссиинискэй көмө оҥоһуллар, оччонон дьон олоҕун быыһыыр кыах үрдүүр.
Күн бүгүн 24 мэдиссиинискэй тэрилтэ уонна 18 амбулаторнай онкологическай көмө киинин (ЦАОП) баазатыгар онкоскрининг кабинеттара үлэлииллэр, онно 95 878 киһи амбулаторияҕа көрдөрдө, күнүскү стационарга сытыаран чинчийии 5 418 төгүл толорулунна.
Тыа сиригэр олорор дьоҥҥо искэн ыарыылаахтары эрдэ булан эмтиир туһугар “Онкодесант” көһө сылдьар биригээдэ тиһигин быспакка былаан быһыытынан үлэлиир. Былырыын кинилэр сэттэ улууска Томпоҕо, Ньурбаҕа, Бүлүүгэ, Анаабырга, Мииринэйгэ, Намҥа, Орто Халымаҕа сырыттылар. Онколог быраастар 1546 киһини көрдүлэр, ол түмүгүнэн 86 киһини “күөх көрүдүөрүнэн” эбии чинчийиигэ Дьокуускайга баар өрөспүүбүлүкэтээҕи онкологическай диспансерга ыыппыттара.
2025 сыл 11 ыйын түмүгүнэн искэн ыарыытын бастакы түһүмэҕэр быһаарыы лаппа тупсан 47,1 бырыһыаҥҥа тэҥнэстэ, 2024 сылга – 43,4 бырыһыан этэ. Онон ыарыы дириҥник өтөн киириэн иннинэ эрдэ булан эмтээһин көрдөрүүтэ тубуста.
Хартыска СИА.
-
0
-
0
-
0
-
0
-
0
-
0
