Ил Түмэн бэрэссэдээтэлин солбуйааччыта, бүддьүөт, үп, нолуок уонна сыана бэлиитикэтин, бас билии уонна приватизация боппуруостарын сис кэмитиэтин бэрэссэдээтэлэ Юрий Николаев, Ил Түмэн олохтоох салайыныыга сис кэмитиэтин бэрэссэдээтэлэ Владимир Прокопьев,  «Якутскэнерго» АУо генеральнай дириэктэрэ Гаврил Алексеев, норуот дьокутаата, «Биир Ньыгыл Арассыыйа» баартыйа Саха сиринээҕи салаатын сэкирэтээрин солбуйааччы, өрөспүүбүлүкэтээҕи офтальмологическай килииничэскэй балыыһа кылаабынай бырааһа Иван Луцкан, СӨ ОДьКХ уонна энэргиэтикэҕэ миниистирэ Вячеслав Емельянов, СӨ сыана бэлиитикэтин судаарыстыбаннай кэмитиэтин бэрэссэдээтэлэ Николай Бочков, СӨ үп миниистирин солбуйааччыта Николай Старостин, СӨ сыана бэлиитикэтин судаарыстыбаннай кэмитиэтин бэрэссэдээтэлин солбуйааччыта Герасим Гуринов көрсүһүүгэ кыттан, нэһилиэнньэ боппуруостарыгар хоруйдаатылар.

Быйыл тарыып, энэргиэтикэ, ОДьКХ боппуруостара сытыытык турдулар. Чуолаан уот тарыыбын кыһалҕата үөскээн элбэх хамсаныы таҕыста. Онон даҕаны сиэттэрэн, нэһилиэнньэни кытта сирэй көрсөн кэпсэтээри,  дьокутааттар, бырабыыталыстыба чилиэннэрэ миэстэтигэр кэлэн дьон санаатын иһиттилэр.

Олохтоохтор 3 чаас устатын  тухары барбыт көрсүһүүгэ үгүһү этиннилэр. Күүтүллүбүтүн курдук , ОДьКХ эйгэтэ билигин улахан уустуктары көрсөн олорор. Ньурба тэрилтэтин ылан көрдөххө, счеттара сабыылаах турар, тэрилтэ гарааһын, хонтуоратын уотун быһан тураллар, бюджет тэрилтэлэрэ ОДьКХ-гар 277 мөл.солк. иэстээх олороллор. Эһиилги оттук сезонугар бэлэмнэнэргэ  уот суоҕа үгүс кыһалҕаны үөскэтэр.

Чоҕунан хааччыйан олорор Ньурба оройуонун биир стратегическай суолталаах тэрилтэтэ Кировтааҕы чох разреһа эмиэ улахан иэскэ киирэн нолуок тэрилтэтигэр 55 мөл.солк иэстээҕин , онтон 8 мөл.солк. пени ааҕыллан турарын, күн түүн суумата улаатан иһэрин тэрилтэ салайааччыта Юрий Николаев этиннэ. Чоҕу хостуур дьоҕус тэрилтэлэргэ бу өттүгэр атын сымнаһыар сыһыан олохтонорун  туруоруста. Юрий Михайлович бу боппуроска үлэлэһиэхпит диэн эрэннэрдэ.

“Арыылаах” тэрилтэтэ эмиэ үп өттүнэн улахан кыһалҕаны көрсөн олорорун эттэ.

Биирдиилээн дьонтон, «Сиибиктэ» хаһаайыстыбаттан уокка холбонууга күчүмэҕэйдэр баалларын туоратарга Гаврил Николаевич үлэлэһиэхпит диэн эрэннэрдэ.

Сүрүн боппуруостары таһынан оробуочай бөлөххө атын хайысханан ыйытыылар киирдилэр. Ньурбатааҕы балыыһаҕа офтальмолог быраас суох, аппараат үлэлээбэккэ турар диэн эттилэр. Иван Петрович көрсүһүү иннинэ балыыһаҕа сылдьан филиал үлэһиттэрин кытта көрсүбүтүн кэпсээтэ. Ньурбатааҕы балыыһа кылаабынай бырааһын кытта каадырдары бэлэмнээһиҥҥэ үлэ ыытабыт, быйыл офтальмолог быраас кэлиэҕэ диэн эрэннэрдэ. Өссө биир исписэлиис үөрэҕин бүтэрэн кэллэҕинэ, Ньурба балыыһатыгар икки исписэлиис үлэлиэҕэ диэтэ.

Уот тарыыбын боппуруоһугар үрдэтиллибит диапазону таһынан нэһилиэнньэ санаатын истэн, өрөспүүбүлүкэ таһымыгар бастаан уларытыылары киллэрэн, муус устарга Арассыыйа таһымнаах улахан сүбэ мунньахха этии киллэрээри бэлэмнии сылдьабыт диэн эттилэр.

«Якутскэнерго» АУо  бэйэтин суотугар 630 мөл.солк.суумалаах 40 мВт кыамталаах икки подстанцияны быйыл Ньурбаҕа аҕалан туруоруохтаах. Манна даҕатан эттэххэ, билигин Ньурбаҕа 25 мВт кыамталаах икки подстанция үлэлии турар. Үрдүк күүрүүлээх 110-наах илииньийэ тутуллуор диэри уот кыамтатыгар кыһалҕа үөскүө суохтаах.

Улахан эрэйи көрдөрбүт, бэбиэскэттэн уһуллубут Сунтаар-Ньурба илииньийэ тутуутун боппуруоһа оннуттан хамсаан, элбэх үлэ, суот, анаалыс ыытыллыбытын түмүгэр, чахчы наада диэн дакаастаан, бу сыл 3 кыбаарталыгар көҥүл кэлэригэр эрэллээхпит диэн Владимир Михайлович иһитиннэрдэ.

Итини таһынан тыа хаһаайыстыбатын эйгэтэ көмүскэллээх буолуутун, Ньурба улууһугар күөх төлөн кэлиитин, сир баайын хостуур тэрилтэлэртэн нолуок киириитин боппуруостара киирэн боротокуолланнылар.

Лена ПЕТРОВА

Хаартыскалар: Огни Нюрбы