Кулун тутар 25 күнүгэр «Аҕа дойду көмүскээччилэрэ» государственнай фонда Намнааҕы салаатын социальнай координатордара Татьяна Гуляева уонна Анна Созонова көҕүлээһиннэринэн, анал байыаннай дьайыыга уолаттарын сүтэрбит аҕалар Нам сэлиэнньэтигэр Дьокуускай куораттан кэлбит общественник-волонтердары — кэргэннии Владимир, Светлана Диодоровтары-Лаврентьевтары кытта көрсүһүүлэрэ буолла. Буойун-оҕолорбут ааттарын үйэтитиигэ бииргэ элбэҕи оҥоруохпут» Um-Redactor 26.03.26 22:10 Кулун тутар 25 күнүгэр «Аҕа дойду көмүскээччилэрэ» государственнай фонда Намнааҕы салаатын социальнай координатордара Татьяна Гуляева уонна Анна Созонова көҕүлээһиннэринэн, анал байыаннай дьайыыга уолаттарын сүтэрбит аҕалар Нам сэлиэнньэтигэр Дьокуускай куораттан кэлбит общественник-волонтердары — кэргэннии Владимир, Светлана Диодоровтары-Лаврентьевтары кытта көрсүһүүлэрэ буолла. Владислав Алексеевич, «Быть воином – жить вечно» — общественное движение отцов погибших воинов на СВО по РС(Я)» хамсааһыны төрүттээччи уонна салайааччы: —Дьокуускайга СВО-ҕа оҕолорун сүтэрбит аҕалары мунньан общественнай түмсүүтэ тэрийиэххэйиҥ диэн мунньахтаабыппыт. Онно сөбүлэһэн түмсүүбүт аатын-суолун ылыммыппыт уонна эмблема оҥостубуппут. Ону эһиэхэ ити тарҕаттым. Санаан көрдөххө, оҕолорбут анал байыаннай дьайыы сыалын-соругун толорууга, Ийэ дойдубут туһугар олохторун толук уурдулар, сырдык тыыннара быһынна. Ол барыбытыгар ыар баттык буолан сылдьар. Онно бүгэн хаалбакка, олорон биэрбэккэ, общественнай түмсүү тэринэн, социальнай ситимҥэ бөлөх арынан кэпсэтиэҕиҥ, кыаллыбат боппуруостары быһаарсыаҕыҥ, туруорсуоҕуҥ диэн этиилээхпин. Намҥа — төрдүс улууспар аҕалар түмсүүлэрин тэрийэр сыаллаах-соруктаах кэллим. Ол тула кэпсэтиэҕиҥ. Аны былырыын Нам улууһуттан биһиэхэ 1,5 т эти хомуйан киллэрбиттэрэ. Санааҥ көрүҥ эрэ итиччэ элбэҕи. Биһиги кэргэмминээн Светлана Владимировналыын анал байыаннай дьайыы саҕаланыаҕыттан, уолбут бааһырыы ылыаҕыттан, Москва уонна Санкт-Петербург байыаннай госпиталларыгар көмөлөһөбүт. Онно эмтэнэр уолаттарбытыгар Сахабыт сирин сибиэһэй аһын самолетунан тиэрдиигэ, хааччыйыыга дьиэ кэргэнинэн дьарыктанабыт. Итиннэ Ил Даохаммыт, Правительствобыт уонна Саха сиринээҕи постпредство улаханнык өйүүр. Анал байыаннай дьайыы саҕаланыаҕыттан өрөспүүбүлүкэбит үтүө санаалаах дьоно баҕа өттүлэринэн хомуйбут 27 т гуманитарнай көмөлөрө тиийэн турар. Онно барыта наарданан улахан холодильниктарга угуллаллар. Оттон ас астааһыныгар, тарҕатыыга, байыастары аһатыыга волонтердар көмөлөһөллөр. Тоҕо ити икки куоракка диэни быһаардахха, итиннэ саамай ыарахан бааһырыыны ылбыт байыастар кэлэллэр. Ыарахан эппэрээссийэлэр оҥоһуллаллар. Эт-сиин улахан эчэйиитин ылбыттар сыталлар. Хомойуох иһин, бэйэбит уолбутун СВО-ҕа эмиэ сүтэрбиппит. Онон элбэх эти хомуйан көмөлөспүттэрин иһин намнарга дьиэ кэргэммит аатыттан улахан махталбытын тиэрдэбит. Көрсүһүүгэ аҕалар санааларын аһаҕастык үллэһиннилэр. Нам улуустааҕы анал байыаннай дьайыыга оперативнай штаб салайааччыта, улуустааҕы депутаттар сэбиэттэрин бэрэссэдээтэлэ Алексей Винокуров кыттыыны ылан суолтаны өссө үрдэттэ. Кинилэр иккиэн аҕалартан киирбит суолталаах, мунаахсытар, долгутар ыйытыыларыгар хоруйдаатылар. Кэпсэтии судургутук, эрэллээх эйгэҕэ ааста. Аҕалар биир санаанан улуустааҕы общественнай түмсүү салайааччытынан Порфирий Слепцову таллылар. Көрсүһүүгэ 13 аҕа кыттыыны ылла. Светлана Владимировна Нам улууһугар анал байыаннай дьайыы кыттыылаахтарын, дьиэ кэргэттэрин өйөөһүҥҥэ тэрээһиннээх, ситимнээх үлэ барарын бэлиэтээтэ, тэрийээччилэргэ махтанна. Дьоһун суолталаах хамсааһыҥҥа ийэлэр, дьахталлар кытталларын таһынан, аҕалар, эр дьон түмсүү тэринэн кыттыһаллара ордук дьайыылаах буоларыгар эрэлин биллэрдэ. Владислав Алексеевич аҕаларга уопсай дьыалаҕа өйү-санааны холбоон, түмсүүлээх буоларга ыҥырда. Кини: «Сырдык тыыннара быстыбыт оҕолорбут ортолоругар үрдүк наҕарааданы ылбатахтар эмиэ бааллар. Ол эрээри кинилэр бука бары дьиҥнээх Геройдар. Буойун-оҕолорбут ааттарын үйэтитиигэ бииргэ элбэҕи оҥоруохпут», — диэн санаатын тиэртэ. Нам улууһугар общественник-волонтердар сырыылара саҥа сүүрээни киллэрдэ – анал байыаннай дьайыыга оҕолорун сүтэрбит аҕалар улуустааҕы общественнай түмсүүлэрэ тэрилиннэ. Үлэлэрэ – иннигэр. «Аҕа дойду көмүскээччилэрэ» государственнай фонда Намнааҕы салаатын социальнай координатордара Татьяна Егоровна Гуляева, Анна Васильевна Созонова арыаллыыр ситимнэригэр баар аҕалар общественнай көҕүлээһиннэрин өйүүллэр. Касьян Олесов-Олук

Касьян Олесов-Олук