Эдэркээн Любалаах Костя 1975 сыллаахха от ыйын 29 күнүгэр холбоспуттарын туһунан Бүлүү улууһунааҕы Гражданскай турук аакталарын туһунан сурукка (ЗАГС) бэлиэтэммит.
Ыал аҕа баһылыга Константин Афанасьевич 1953 с. муус устар 11 күнүгэр Бүлүү оройуонун Өкүндү нэһилиэгэр төрөөбүтэ. Намнааҕы ПТУ-га тырахтарыыс идэтин ылан, өр сылларга ПМК, киин балыыһа суоппарынан үтүө суобастаахтык үлэлээбитэ. Өрөспүүбүлүкэ бэтэрээннэрин волейболга араас спартакиадаларын, күрэхтэрин кыттыылааҕа. “Бүлүү улууһугар физкултуура уонна успуорт сайдыытыгар кылаатын иһин”, “Бүлүү улууһун бэтэрээннэрин хамсааһынын сайдыытыгар кылаатын иһин” бэлиэлэр хаһаайыннара, “СахаВА” бочуоттаах маастара, үлэ бэтэрээнэ.
Ыал ийэтэ Любовь Софроновна 1956 с. атырдьах ыйын 23 күнүгэр Бүлүү куоратыгар төрөөбүтэ. Орто оскуола кэнниттэн “Оскуола-производство-үрдүк үөрэх” девиһинэн Өкүндүгэ ньирэй көрөөччүнэн үлэлээбитэ. Салгыы Бүлүүгэ кэлэн өр сылларга Бүлүү 2-с №-дээх оскуолатыгар асчытынан үлэлээбитэ. Сыралаах үлэтин түмүгүн Үөрэх уонна билим министиэристибэтин, оскуола элбэх махтал суруктара туоһулууллар. “ЫБСЛКС 100 сыла” мэдээлинэн наҕараадаламмыта, үлэ бэтэрээнэ.
Прокопьевтар түөрт оҕону төрөтөн, көччөх гына көтүппүттэрэ, олох киэҥ аартыгар үктэннэрбиттэрэ. Оҕолоро бэйэлэрэ билигин улахан дьон буолан, ийэ, аҕа үрдүк аатын сүгэллэр. Константин Афанасьевич уонна Любовь Софроновна алта сиэн, икки хос сиэн тапталлаах эбээлэрэ, эһээлэрэ. Прокопьевтар Бүлүү улууһун “Кыһыл көмүс сыбаайба” диэн Бочуот кинигэтигэр 194-с №-инэн киирдилэр. Дьоро күҥҥэ үбүлээрдэргэ Саха Өрөспүүбүлүкэтин “Дьиэ кэргэн килбиэнэ” бэлиэ туттарылынна. Үгүс үтүө эҕэрдэ тыллара этилиннэ. Күндү үбүлээрдэрбит, чэгиэн-чэбдик доруобуйаланыҥ, сүүс-сүүскүтүттэн өйөнсөн өссө да уһуннук олоруҥ.
Марина Иванова, Бүлүү улууһунааҕы ГТАС салаатын салайааччы.
Саха Өрөспүүбүлүкэтин Бырабыыталыстыбатын иһинэн Гражданскай турук аакталарын туһунан суруйуу управлениетын саайтыттан.
-
0
-
0
-
0
-
0
-
0
-
0
