Саахалланар туруктаах хаарбах дьиэттэн көһөргө 2025 с. 37 суругунан, 18 тылынан үҥсүү киирбит. Онтон 4 үҥсүү толоруллубут, боломуочунай көрдөһүүлэринэн борокуратуура уорганнара олохтоммут бэрээдэгинэн 13 үҥсүүнэн миэрэ ылбыттар. Ол туһунан Ил Түмэн XVIII пленарнай мунньаҕар СӨ Киһи быраабыгар боломуочунай Сардаана Гурьева 2025 с. үлэтин түмүгүн билиһиннэрэр отчуотугар иһитиннэрдэ.
2017 с. тохсунньу 1 күнүн кэнниттэн саахалланар туруктаах диэн билиниллибит элбэх кыбартыыралаах дьиэттэн дьону көһөрүү уустугуран турар. 2012 с. тохсунньу 1 күнүттэн 2017 с. тохсунньу 1 күнүгэр диэри саахалланар туруктаах дьиэлэр испииһэктэригэр киирбит хаарбах дьиэлэри “СӨ олорорго сөбө суох дьиэ пуондата бигэтик кыччаан иһиитин хааччыйыы” эрэгийиэннээҕи бырайыакка киирэллэр.
Ол эрэн 2017 с. тохсунньу 1 күнүн кэнниттэн саахалланар туруктаах диэн билиниллибит элбэх кыбартыыралаах дьиэлэр «2019-2025 сылларга саахалланар туруктаах дьиэ пуондатыттан дьону көһөрүү» диэн өрөспүүбүлүкэтээҕи анал бырагыраамаҕа киирбэтэхтэр, ол иһин дьону көһөрүү болдьоҕо 2030 с. диэри уһатыллыбыт.
Тутуу министиэристибэтин 2025 с. ахсынньы 31 күнүнээҕи иһитиннэриитинэн үп-харчы тиийбэтин түмүгэр саахалланар туруктаах дьиэттэн 153 тыһ. кв.м. иэннээх дьиэ көһөрүллүбэккэ хаалбыт. Үп-харчы тиийбэтин сүрүн төрүөтэ, РФ Тутууга министиэристибэтэ олохтообут кээмэйинэн 2019 с. биир кв.м. 73,07 тыһ. солк. аахпыттар. Онтон 2025 с. сыана сыллата ыараан, Дьокуускайга биир кв.м. 153000 солк. тиийдэ. Үп-харчы тиийбэтин туһунан СӨ Бырабыыталыстыбата федеральнай кииҥҥэ тиэрдэ сатыыр. Онон 2022 с. Арассыыйа Бырабыыталыстыбатын резервнэй пуондатыттан 8 млрд. солк., 2024 с. 1,6 млрд. солк. бэриллибит эрээри, хаарбах дьиэттэн дьону көһөрүү бытаан, 17-ис кыбаарталга эргэ мас самнархай дьиэлэр сиргэ батары түһэн тураахтыыллар.
Хаартыска СИА.
-
0
-
0
-
0
-
0
-
1
-
0
