Бэлиэтээн эттэххэ, “Бастыҥ булчут саха быһаҕа – 2026” күрэх төгүрүк бэһис сылын тэрилиннэ. Быйыл 9 улуустан 19 быһах ууһун маастара кытынна. Күрэх хас да тыҥааһыннаах түһүмэхтээх буолла. Кыттааччылар 5-тии буолан 4-түү бөлөххө арахсан кииристилэр. Бастакы түһүмэххэ кумааҕыны быһыта сотон быһахтарын биитэ төһө сытыытын көрдөрдүлэр. Убаһа атаҕын толунньаҥ уҥуоҕуттан туйаҕар диэри өттүн астаатылар, тыһын сүллүлэр. Мас тоһоҕону кыһан уһуктаан биэрдилэр. 2,5 см халыҥнаах, сыл кэриҥэ хаппыт тиит мас хаптаһынын кыспыт мастарын төрдө батар гына быһахтарынан дьөлөҕөс хастылар. Онно маһы батары анньан сүлбүт тыстарын тэһэн кэтэртилэр. Өссө канаат быаны быһахтарынан 20 кэрчиккэ быстылар. Күрэх быраабылатынан быһаҕа алдьаммыт маастар туораан истэ. Финалга 3 уус таҕыста, бэрт тыҥааһыннаах киирсиини көрдөрдүлэр. Күрэх кэмигэр туох да мөккүөрдээх түгэн тахсыбата, барыта орун-оннугар ааста.
Кытаанах киирсии кэнниттэн Уус Алдантан төрүттээх, саха быһаҕын ууһа Дмитрий Ховров тэҥнээҕин булбакка кыайыы өрөгөйүн биллэ. 2-c миэстэни талыы талба Тааттаттан Гаврил Мохначевскай ылла. 3-с миэстэҕэ Мэҥэ Хаҥаластан төрүттээх Василий Макаров тигистэ.
“Бастыҥ саха булчут быһаҕа-2026” күрэх кыайыылааҕа Дмитрий Ховров Уус Алдан Бороҕонугар олорор. 2021 сылтан уус кыһатын тэринэн саха быһахтарын оҥорор. “Бастыҥ булчут саха быһаҕа” күрэххэ кыттарга соһуччу быһаарыммыт. “Кыайаргар төһө эрэллээх этигиний?” диэн ыйытыыга маннык хоруйдаата:
– Киһи күрэххэ “хотторобун” диэн санаалаах кыттыбат. Испэр “кыайбыт киһи” диэн эрэл санаа баара. Маннык таһымнаах күрэххэ бастакы кыттыым буолар. Бэйэбин холонон көрөр сыаллааҕым. Байанайым биэрэн кыайыылаах аатын сүктүм. Мин санаабар, күрэххэ кыттарга быһах ханнык тимиртэн оҥоһуллубута элбэҕи быһаарар. 65Г тимиртэн оҥоһуллубут быһахпынан кытынным. Бу тимир бэйэтин олус үчүгэйдик көрдөрдө, хаачыстыбалаахтык оҥордоххо, туохха да бэриммэт буоларын өссө төгүл итэҕэйдим. Инникитин бу курдук салгыы үлэлиэм.
Бириистэрэ оһуобай. “Туос” маҕаһыын салайааччыта Дмитрий Дмитриевич, аҕата Дмитрий Егорович уонна “Бэрт Ууһа” уус кыһатын дириэктэрэ Илларион Егорович Поповтар успуондааннар сыаналаах бириистэри туттум. Тэрийээччилэргэ, успуонсардарга барҕа махтал буоллун!
Быйылгы күрэх сүрүн успуонсарынан “Туос” маҕаһыын дириэктэрэ, Арассыыйа мас тардыһыытыгар үтүөлээх маастара, аан дойду биэс төгүллээх чөмпүйүөнэ Дмитрий Попов буолла. Кини аҕатын урбаанньыт Дмитрий Егоровиһы уонна убайа, “Бэрт Ууһа” уус кыһатын дириэктэрэ Илларион Егоровиһы кытта кыттыһан сыаналаах бириистэри туруордулар. 1 миэстэлээххэ – “МР-155” саа, 2-с миэстэҕэ – эрэһиинэ оҥочо, 3-кэ – “Бадаар” маҕаһыыҥҥа 10 тыһ. солк. сэртипикээт. Ону таһынан анал ааты ылбыттарга уонна бары кыттааччыларга сэртипикээттэри туттардылар. Бу бириистэринэн Поповтар аймах хааччыйдылар. Ону таһынан кыайыылаахха СӨ Айылҕа харыстабылын министиэристибэтэ, Булт дэпэртээмэнэ тайахха уонна “Джанда” ХЭУо генеральнай дириэктэрэ Степан Борисов 2-c, 3-с миэстэлээх кыттааччыларга биирдии табаны бултуурга лиссиэнсийэлэри туттардылар.
Күрэх бу курдук өрө көтөҕүллүүлээхтик түмүктэннэ. Саха быһаҕа сытыытынан, бигэтинэн, туохха бэриммэтинэн, чахчы да, эр киһи эрэллээх доҕоро буоларын илэ-чахчы көрөн сөхтүбүт.
-
1
-
0
-
0
-
0
-
0
-
0
