Дьокуускай куорат мунньаҕын дьокутаата, урукку өттүгэр МКУ СЭГХ (куорат хаһаайыстыбатын үлэлэтэр сулууспа дириэктэрэ), билигин Дьокуускай муниципальнай аптекаларын салайааччыта Владимир Аммосов киинэ режиссерун уонна сценариһын быһыытынан бастакы үлэтэ сыанаҕа таҕыста. Кини Москубаҕа Губкин аатынан ньиэп уонна гаас үнүбүрсүөтүн бүтэрбитэ, идэтинэн хайа инженера уонна Дьокуускайдааҕы экэниэмикэ-быраап үнүстүүтүгэр юрист идэтин баһылаабыта. Тиэхиньиичэскэй үөрэхтээх киһи халыҥ сценарийы суруйан, дьээбэлээх, бэрт сэргэх киинэни устубута сонун көстүү.
Киинэ продюсера Дмитрий Шадрин, уус-уран салайааччы кыра Алексей Амбросьев дьону күллэрэр, тыҥааһыннаах хартыынаны күлүүлээх оҥорор буочардара тута көстөр.
Былыргы уос номоҕо кэпсииринэн Тойон Баай куулунан көмүһүн дьон булбат сиригэр, тайҕа быыһыгар, үрэх баһыгар ханна эрэ кистээбит. Ким да булбатын диэн көмүһүн хамначчыттарын кытта көмпүт диэн сурах тарҕаммыт. 1975 с. сүрүн дьоруойбут Сашка эһэтэ, оччолорго эдэр геолог Барыыс «ТБ» диэн суруктаах көмүс манньыаты булан, Тойон Баай көмүһэ ханна кистэнэ сытарын туһунан дневнигар суруйбут.
Биһиги кэммитигэр икки табаарыстыы уолаттар Сашка уонна Витек улахан аптарытыакка 30 мөл. солк. иэскэ ыйанан хаалан, тыыннаах хаалар туһугар халыҥ харчы, онтон былыргы кылаат көрдүүр түбүккэ түһэллэр. Ол быыһыгар эдэр, кырыаһыабай, бааһынай кыыс сүрэҕин туһугар киирсэллэр.
Кыыс кими талар, уолаттар кылааты хайдах булаллар? Киинэ кэмигэр: «Көмүс дьолго тиэрдиэ суоҕа”, — диэн хаста даҕаны этэллэринэн икки табаарыстыылар өлүү-тиллии икки ардынан, сытыы быһах уһугунан хааман улахан тургутугу ааһаллар. Режиссер толкуйунан саамай улахан баай көмүс, харчы, баай-дуол буолбатах, дьон бэйэ-бэйэҕэ истиҥ сыһыана, ыраас таптала туохтааҕар даҕаны күндү.
«Золото Тойон Бая. Дневник геолога» киһи астына-дуоһуйа көрөр мүччүргэннээх кэмиэдьийэтэ муус устар 9 күнүттэн улахан экраҥҥа тахсыаҕа.
Ааптар хаартыскаҕа түһэриитэ.
-
0
-
0
-
0
-
0
-
0
-
0
