Норуот итэҕэллээхтэрэ бу күн Абый улууһун киинигэр Белай Гораҕа сырыттылар.
Парламентарийдар дохсун сүүрүктээх Индигиир өрүс үрдүгэр турар бөһүөлэк производственнай уонна социальнай эбийиэктэригэр сырыттылар, нэһилиэнньэни кытта көрүстүлэр. Дэлэгээссийэ сүрүн соругунан быйыл киирбит олохтоох салайыныы сокуонун миэстэтигэр хайдах үлэлиэхтээҕин туһунан билиһиннэрии, өйдөтүү уонна хотугу улуустар кыһалҕаларын, социальнай-экэнэмиичэскэй балаһыанньаларын кытта билсии буолар.
Ол курдук дьокутааттар А.К. Чиркова аатынан киин балыыһаҕа сырыыларыгар мэдиссиинэ үлэһиттэрэ улууска каадыр тиийбэтин боппуруоһун туруордулар. Кылаабынай быраас эппитинэн, ордук быраастар тиийбэттэр эбит, холобура, хас да сыл устата гинеколог быраас суох .Улуус киинигэр саҥа балыыһа комплексын тутуу эмиэ болҕомтоҕо киирдэ, Алексей Еремеев бэлитээбитинэн бу бырайыак федеральнай бырагыраама чэрчитинэн тутуллар уонна үлэҕэ киллэриллиэҕэ.
Дэлэгээссийэ ону тэҥэ Белай Гораатааҕы оҕо успуорт оскуолатыгар сырытта. Дириэктэр Иван Горохов 9 сыл устата толорутук дьарыктанарга сөбө суох саалаҕа эрчиллэбит диэн балаһыанньаны баарынан билиһиннэрдэ уонна успуорт саала тутуутун туруоруста.
Дьокутааттар салгыы гимназияҕа самалык тутуу хаамыытын кытта билистилэр уонна өрүс нөҥүө, чугастыы турар Сутуруоха бөһүөлэгэр сылдьан Ураһалаах оскуолатын үлэтин-хамнаһын кытта билистилэр.
Күн иккис аҥаарыгар улуус дьаһалтатыгар парламент бөлөҕүн кытта мунньах буолла, онно дьаһалта эппиэттээх үлэһиттэрэ, нэһилиэктэр баһылыктара,тэрилтэлэр, учреждениелар салайааччылара уонна уопсастыбаннас бэрэстэбиитэллэрэ кытыннылар.
Көрсүһүү кэмигэр хотугу эргимтэ кэтэҕинээҕи уустук суоллаах-иистээх улуус олохтоохторо Дьокуускай хайысхатынан сөмөлүөтүнэн көтүүгэ субсидиялаах миэстэлэри көрөрү туруорустулар. Абый улууһа балайда элбэх ынах сүөһүнү, сылгыны иитэр улуус буоларынан уонна ходуһа сирэ лаҥхатыйан иһэринэн өртөөһүнү көҥүллээһини быһаарар кэм уолдьаспытын эттилэр. Тыл этээччилэр салгыы олохтоох көҕүлээһини өйүүр бырагыраама үлэтин, (ППМИ), бөһүөлэктэргэ бөҕү мунньар контейнердары туруоруу бэйдиэ сылдьар ыттары көрүү-харайыы кыһалҕатын, эр дьон биэнсиэйэҕэ тахсар саастарын туһунан уо.д.а. боппуруостары биэрдилэр, этиилэри киллэрдилэр.
Хаартыскалар: "Хотугу кыым" хаһыат
-
1
-
0
-
0
-
0
-
0
-
0
