Туохха барытыгар сыана хас да төгүл үрдүү турар, оттон хамнас ону кыайан сиппэт. Тымныы тыйыс дойдуга олорорбут быһыытынан, кыһыҥҥы таҥаһы атыылаһарга унтуу сыаната 55 000 солк., тохсунньу тоһуттар тымныытын тулуйар сылаас түүлээх пуховик 40 000 – 60 000 солк. бүтүн хамнас сыаната. Кыра хамнастаах дьон кыһалҕаттан икки үлэҕэ үлэлиир, ол иһин хас да сиринэн сүүрэ сылдьан, үлэ хаачыстыбата сороҕор доҕолоҥнуур.
2026 с. бүддьүөтү ылыныыга ыам ыйынааҕы ыйаахха киирбэтэх бүддьүөт үлэһиттэрин хамнаһын үрдэтиини дьокутааттар дьүүллэспиттэрэ эрээри, хааһынаҕа үп кырыымчыгыттан сылтаан, эмиэ тохтоон хаалбыта. Үбү-харчыны кэм ирдэбилинэн экэниэмикэни бигэ туруктаах оҥорорго, Анал байыаннай дьайыы кыттыылаахтарын өйүүргэ ыыталлар.
Элбэх оҕолоох ыаллары өйөөһүн судаарыстыба социальнай бэлиитикэтин тумус туттар стратегическай суолталаах сыала-соруга. Бу хайысханан 2025 с. эрэгийиэннээҕи көмөнү үбүлүүргэ 1,8 млрд. солк. ыыттылар, дьиэ кэргэттэргэ 1,4 млрд. солк. төлөбүр оҥоһулунна, 245 мөл. солк. хомунаалынай өҥө төлөбүрүн толуйарга көрүлүннэ, 50 мөл. солк. айан төлөбүрэ төлөннө, 787 мөл. солк. оскуолаҕа үөрэнэр элбэх оҕолоох ыаллар оҕолорун аһатары үбүлээтилэр.
СӨ нэһилиэнньэтэ дьарыктаах буолуутун судаарыстыбаннай кэмитиэтин иһинэн «Саха Сирэ үлэлиир. Үлэһиттэр» диэн бырайыакка 94 үлэни биэрээччи кытталлар, өрөспүүбүлүкэттэн 15 547 киһи үлэҕэ киирбититтэн 60% үлэлии хаалбыт, ол иһигэр 7492 эдэр исписэлиистэр, 6549 тыа сирин олохтоохторо. Кинилэр үлэҕэ киирээт ортотунан 160,8 тыһ. солк. хамнаһы ылаллар, онтон уопутуран истэхтэрин аайы хамнастара эмиэ эбиллэр. Саамай элбэх киһини үлэҕэ ылбыт хампаанньалар: «Анаабыр алмаастара», «АЛРОСА», СӨ ОДьКХ, «Саха Сирин тимир суоллара», «Якутскэнерго».
Биллэн турар, дьахталлар, биэнсийэлээх дьон силиэсэрдии, сыбаарсыктыы барбаттар, ол иһин кинилэри үлэнэн хааччыйарга эмиэ болҕомто ууруллуон наада.
Хаартыска Мария Васильева, СИА.
-
0
-
0
-
0
-
0
-
0
-
0
