Уопсастыба

Ил Түмэҥҥэ Сардаана Гурьева дакылаатын истэн баран дьокутааттар ыйытыктары биэрдилэр. Иван Луцкан байыаннай сулууспаҕа уонна Анал байыаннай дьайыыга саамай элбэх үҥсүү киирбит, ол тугу кытта сибээстээҕий, дьон доруобуйатыгар сыһыаннаах туох сурук киирбитин туоһуласта.

Василий Николаев Анал байыаннай дьайыыга барарга хантыраак баттаһарга суһал байыаннай сулууспаҕа сылдьар уолаттары ыгыы-түүрүү баар диэн төрөппүттэр үҥсэллэр дуо? — диэн интэриэһиргээтэ.

Онуоха Сардаана Гурьева Аҕа дойду уонна олохтоох нэһилиэнньэ интэриэһин көмүскүүргэ улахан болҕомто уурулларын бэлиэтээтэ. Анал байыаннай дьайыы кыттыылаахтарыгар, кинилэр дьиэ кэргэттэригэр быраап боппуруостарыгар көмө оҥоһуллар. Киһи быраабын көмүскүүргэ «Аҕа дойдуну көмүскээччилэр» судаарыстыбаннай пуонда филиалын, СӨ буойуннарын дьиэ кэргэттэрин кэмитиэтин кытта тиһигин быспакка бииргэ үлэлэһэллэр.  

Анал байыаннай дьайыы кыттыылаахтара үксүн бааһырбыт буойуннары эмтииргэ хаачыстыбалаах мэдиссиинэ көмөтүн оҥоруу боппуруостарыгар, өстөөх билиэнигэр түбэспит уолаттары босхолуурга, сураҕа суох сүппүт дьону көрдүүргэ, эрэннэриллибит төлөбүрү толору уонна кэмигэр ыларга, байыаннай сулууспаттан уурайарга, уоппуска ыларга, буойун дьиэ кэргэнин күннээҕи кыһалҕатын быһаарарга кэлэллэр.

Холобур, 2025 с. тохсунньутугар боломуочунайга байыаннай сулууспалаах И. диэн киһи кэргэнэ эрин билиэнтэн босхолоон, төнүннэрэргэ көмө көрдөөн, сурук ыыппыт. Бу түбэлтэни быһаарарга боломуочунай суһаллык РФ Киһи быраабыгар боломуочунайга уонна РФ Оборонаҕа министиэристибэтин аадырыстарыгар сурук ыыппыт. 2 сыл буолан баран, ол аата 2025 с. ыам ыйыгар, Арассыыйа – Украина билиэннэйдэринэн атастаһыытын чэрчитинэн дьахтар кэргэнэ дойдутугар төннүбүт.

2025 с. дойду Бэрэсидьиэнэ Владимир Путин, РФ Киһи быраабыгар боломуочунай, РФ Оборонаҕа министиэристибэтин кыттыгас үлэтин көмөтүнэн 9 байыаннай сулууспалаах дьон дойдуларыгар, Саха Сиригэр эргиллэн кэлбиттэр.

Маннык боппуруостары быһаарарга киһи быраабын көмүскээччи Оборона министиэристибэтин, Илиҥҥи байыаннай уокурук Байыаннай борокуратууратын, РФ Генеральнай борокуратууратын кытта ыкса үлэлэһэр. Кини дьон үҥсүүтүн ылыынан эрэ муҥурдаммакка, кыаҕа баарынан кыһалҕалаах дьоҥҥо күөмчүлэппит бырааптарын чөлүгэр түһэрэргэ, үлэтэ түмүктээх буоларын туһугар үлэлиир.

Хаартыска СИА.