Боломуочунай Ленскэй уонна Мииринэй улууһугар бара сылдьан оройуон борокуруордарын кытта АБДь кыттыылаахтарын кытта көрсүһүүтүгэр буойуннар огдооболоро оҕолоругар биэнсийэ анатарга көмөлөһөрүгэр көрдөспүттэр.
Кинилэр буойун тус дьыалата байыҥкамаакка өр кэмҥэ киирбэккэ сытарын эппиттэр. Ыытыллыбыт бэрэбиэркэ түмүгүнэн байыаннай комиссариат дуоһунастаах дьоно кэһиини таһаарбыттара биллибит, ол иһин СӨ байыаннай хамыһаарыгар баар кэһиини көннөрөргө сурук ыыппыттар. Онон аҕата, иитэр киһитэ суох хаалбыт оҕолорго тута биэнсийэ анаабыттар.
Доруобуйа харыстабылыгар 2025 с. 137 үҥсүү киирбит. Дьон бааһырбыт буойуннарга кэмигэр мэдиссиинэ көмөтүн оҥорон испэттэрин, эбэтэр көдьүүһэ суохтук оҥороллорун, ВВК ыытарга кэккэ мэһэйдэри көрсөллөрүн бэлиэтииллэр. Былырыын госпитальга эмтэнэ киирии кэмигэр кыаллыбакка, болдьоҕун көһөрөн иһэллэрин үҥсүбүттэр.
Норуот дьокутааттара Антонина Григорьева, Елена Голомарева СӨ Киһи быраабыгар боломуочунай Сардаана Гурьеваны кытта ыкса үлэлэһэллэрин этэн туран, кини үлэтэ үтүө түмүктээҕин, уустук кыһалҕаны быһаарарга, дьон быраабын көмүскүүргэ дьүккүөрдээҕин, дьоҥҥо амарах сыһыаннааҕын туһунан эттилэр. Онон куоластааһын түмүгүнэн норуот дьокутааттара СӨ Киһи быраабыгар боломуочунай 2025 с. үлэтин өйөөтүлэр.
2026 с. сүрүн сорук быһыытынан, АБДь кыттыылаахтарын уонна кинилэр дьиэ кэргэттэрин бырааптарын көмүскүүргэ, дьиэ-уот боппуруостарыгар, социальнай көмүскэлгэ уонна олох ыарахан түгэнигэр түбэспит дьоҥҥо көмөлөһөргө үлэ салгыы ыытыллыаҕа.
Хаартыска Мария Васильева, СИА.
-
0
-
0
-
0
-
0
-
0
-
0
