Уопсастыба

Оттон улуустарынан ханнык болдьоххо судургу кустааһын саҕаланарын мантан билсиэххитин сөп:

1 №-дээх зона: ыам ыйын 11-20 күннэрэ

Алдан, Амма, Мэҥэ Хаҥалас, Нам, Нерюнгри, Сунтаар, Таатта, Томпо, Уус Алдан, Уус Майа, Чурапчы, Хаҥалас уонна Дьокуускай куорат;

2 №-дээх зона: ыам ыйын 14-23 күннэрэ

Үөһээ Бүлүү, Бүлүү, Горнай, Ленскэй, Мииринэй (Айхал уонна Удачнай таһынааҕы бултуур сирдэртэн ураты), Ньурба, Өлүөхүмэ, Өймөкөөн;

 3 №-дээх зона: ыам ыйын 31 - бэс ыйын 9 күннэрэ

Абый, Өлөөн, Мииринэй оройуонун Айхал бөһүөлэгин уонна Удачнай куоратын таһынааҕы бултуур сирдэр;

4 №-дээх зона: ыам ыйын 15-24 күннэрэ

Аллайыаха, Үөһээ Дьааҥы, Усуйаана;

5 №-дээх зона: бэс ыйын 2-11 күннэрэ

Анаабыр;

6 №-дээх зона: ыам ыйын 30 - бэс ыйын 8 күннэрэ

Булуҥ оройуона;

7 №-дээх зона: ыам ыйын 5-14 күннэрэ

Үөһээ Халыма;

8 №-дээх зона: ыам ыйын 22-31 күннэрэ

Эдьигээн, Эбээн-Бытантай;

9 №-дээх зона: ыам ыйын 18-27 күннэрэ

Муома;

10 №-дээх зона: ыам ыйын 10-19 күннэрэ

Орто Халыма, Аллараа Халыма;

11 №-дээх зона: ыам ыйын 9-18 күннэрэ

Кэбээйи.

Мас көтөрүгэр булт бары улуустарга ыам ыйын 7-16 күннэригэр көҥүллэнэр.

Муус устар 25 күнүттэн олордор куһунан булт саҕаланар.

Куска көҥүлү биэрии Айылҕа министиэристибэтин бары территориальнай салааларыгар бэриллэр.

Дьокуускайга кус лисиэнсийэтин маннык аадырыстарынан биэрэллэр:

- 202-с түөлбэ, 18/2 куорпус, 2-с этээс (Айылҕа харыстабылын судаарыстыбаннай кэмитиэтэ);

- Дзержинскэй уул.. 3/1, 1-кы этээс, 31 каб. («ДБР ООПТ и ПП» ГБУ).

Кус көҥүлүгэр сайабылыанньаны судаарыстыбаннай уонна муниципальнай өҥөлөр порталларын нөҥүө туталлар: https://e-yakutia.ru/#/createorderform/1400000000160255394)

Сиһилии: https://minpriroda.sakha.gov.ru/news/440

Саха Өрөспүүбүлүкэтигэр сааскы кус көҥүлэ чугаhаабытынан булчуттар манныгы тутуhаллара ирдэниллэр:

— биллэрин курдук, саа хаhаайына бэйэтин бас билэр уотунан эстэр сэбиргэлин (докумуоннаах саатын) олорор аадырыhыгар бары ирдэбиллэри тутуhан, туора дьон көрбөт сиригэр – тимир сиэйпэ иһигэр угуохтаах (харайыахтаах), ону тэҥэ саа уонна саа ботуруоннара тус-туспа харайыллыахтаахтар;

— булчут бултуур сиригэр ханнык баҕарар көрүҥнээх тырааныспарынан барарга сааны анал чехолга илдьэ сылдьыллыахтаах. Ону тэҥэ саа иитиитэ суох буолуохтаах, ботуруоннара сааттан туспа сылдьыахтаахтар. Өскөтүн, саа анал чехола суох, эбэтэр чехол иһигэр иитиилээх сылдьар түгэнигэр, туhааннаах киhи административнай эппиэтинэскэ тардыллар (ст. 20.12 КоАП РФ)

— өскөтүн, саа докумуонун (РОХа – разрешение на хранение и ношение оружия) көҥүлэ бүппүт түгэнигэр, булчут саатын бултуу илдьэ барара даҕаны, дьиэтигэр туруорара да көҥүллэммэт. Бэрэбиэркэ кэмигэр туhааннаах киhи административнай эппиэтинэскэ тардыллар уонна саата былдьанар (ст. 20.11, 20.8 КоАП РФ). Оннук түбэлтэ тахсыбатын туһугар, сааҕыт көҥүлэ бүтүөн иннинэ, хаhан баҕарар болдьоҕун уhатыыга сайабылыанньа (докумуон) биэрэргит булгуччулаах. Ол эрээри илдьэ сылдьар саатын көҥүлүн болдьоҕо бүтүө биир ый иннинэ Росгвардия салалтатын иhинэн улуустардааҕы лицензиялыыр-көҥүллүүр үлэҕэ салаатыгар кэлэн уhатара булгуччулаах (холобур, саа докумуона 10.06.2026 с. бүтэр буоллаҕына, саа докумуонун 10.05.2026 с. диэри туттарыахтааххыт, ол эбэтэр биир ыйын хойутаппакка, хаhан баҕарар туттарыахха сөп);

— булчут бултуур сиригэр тиийэн туох баар бары ирдэниллэр сааны илдьэ, уура, харайа сылдьыы быраабылаларын тутуһуохтаах, ол курдук дурдаҕа (сэhээккэҕэ) киирэн баран биирдэ саатын чехолтан хостуохтаах, бултаан бүттэ да ботуруоннарын саатыттан ылыахтаах, итиилээх даҕаны, итиитэ суох даҕаны саатын дьон диэки туһаайыа суохтаах. Массыынаттан эбэтэр тыыттан (лодкаттан) саатын ыларыгар утары өттүттэн ылбакка, туораттан ылыахтаах, дурдаттан саатын ыларыгар, төһө даҕаны сааттан ботуруонун ылбытын иһин, эмиэ утары ылыа суохтаах. Хомойуох иhин, өрөспүүбүлүкэбит үрдүнэн сылтан-сыл бу үөhээ ыйыллыбыт быраабылалары тутуспакка, сааттан дьон дэҥнэнэр быhылааннара тахса тураллар;

— булчут бултуур сиригэр тиийэн баран, дьиэтигэр кэлэригэр-барарыгар бэйэтин бас билэр (гладкоствольнай, нарезной) сааларын туора дьон билиитигэр, туора дьоҥҥо уларсара, биэрэрэ көҥүллэммэт, эбэтэр онно-манна кистээн хаалларбакка, бэйэтин кытта илдьэ сылдьыахтаах. Бэрэбиэркэ кэмигэр саалар полиция эбэтэр охотнадзор сотрудниктарынан ылыллаллар. Бу түгэҥҥэ саа хаһаайыныгар уонна илдьэ сылдьыбыт киhиэхэ административнай боротокуол туолар (ст. 20.8 ч. 4, 20.10 КоАП РФ) эбэтэр холуобунай эппиэтинэскэ тардыллыаххытын сөп (ст. 222 УК РФ);

— өскөтүн бэрэбиэркэ кэмигэр, булчут уотунан эстэр саатын арыгы испит туруктаах сылдьан түбэһэр түгэнигэр административнай эппиэтинэскэ тардыллар. Бу түгэҥҥэ миэрэтэ ыстараабы кытта саата утилизацияҕа барыан сөп (ст. 20.8 ч. 4.1 КоАП РФ);

— булчут бултаан бүтэн, дьиэтигэр кэлэн саатын ампаарга, күүлэҕэ, ыскаапка уо.д.а. сиргэ уурара булгуччу бобуллар, тутатына сиэйпэтигэр угара булгуччулаах. Өскөтүн, бэрэбиэркэ кэмигэр саа сиэйпэ таһыгар турар түгэнигэр, хаhаайын административнай эппиэтинэскэ тардыллар (ст. 20.8 ч. 4 КоАП РФ). Дьон бултаан кэлэн баран, сааларын харайбакка, онно-манна ууран барбыттарын түмүгэр, сокуоннай саастарын ситэ илик оҕолор хаалларбыт сааны ылан оонньоон, бэйэ-бэйэлэрин эчэтэр түгэннэрэ, хомойуох иhин, тахса турар. Маннык быһылаан буолар түгэнигэр саа хаһаайына холуобунай эппиэтинэскэ тардыллар (ст. 224 ч. 1 УК РФ – небрежное хранение огнестрельного оружия, создавшее условия для его использования другим лицом, если это повлекло смерть человека или иные тяжкие последствия) уонна инникитин сааланара көҥүллэммэт;

— докумуона суох сааны, ол эбэтэр булан ылбыт, туора дьон биэрбит, эбэтэр бэйэ икки ардыгар докумуона суох атыыламмыт, урукку докумуона суох эhэтиттэн, аҕатыттан хаалбыт сааларын дьиэлэригэр туруораллара да, бултка илдьэ бараллара да көҥүллэммэт, ону таhынан ботуруону бэйэ икки ардыгар батарар ол эбэтэр бэлэх биэрии эмиэ көҥүллэммэт (незаконное хранение, передача, сбыт огнестрельного оружия и патронов к нему). Оннук сааны тутатына Росгвардия салалтатын иhинэн улуустааҕы лицензиялыыр-көҥүллүүр улэ отделениеларыгар эбэтэр улуустааҕы Ис дьыала отделларыгар кэлэн туттараллара булгуччулаах. Докумуона суох сааны илдьэ сылдьан түбэhэр түгэҥҥитигэр административнай боротокуол толоруллар (ст. 20.10 КоАП РФ), ону таhынан холуобунай эппиэтинэскэ тардыллыаххытын сөп (ст. 222 УК РФ). Маннык эппиэтинэскэ тардыллыбыт киhи кэлин докумуоннаах сааны атыылаhарыгар сокуонунан күчүмэҕэйдэр үөскүөхтэрин сөп;

— докумуона суох сааны баҕа өттүнэн туттардаххытына, харчы төлөнөр. Ол курдук, Саха Өрөспүүбүлүкэтин Бырабыыталыстыбатын 12.02.2004с. 63 №-дээх уурааҕар олоҕуран:

1. Доруоп саа 6000 (алта тыһыынча) солкуобайга тэҥнэһэр.
2. Буулдьа саа 8000 (аҕыс тыһыынча) солкуобайга тэҥнэһэр

Хаартыска: Сахагов.ру.