Уйгууна Михайлова урукку идэтинэн балерина, Опера уонна балет тыйаатырыгар оҕо сааһын ыра санаатын ситиһэн, сыанаҕа тахсан үрүҥ лыах курдук өрө көтө сылдьан үҥкүүлээбитэ, онтон балет устуудьуйатын арыйан, кырачаан оҕолору бу идэҕэ уһуйбута. Билигин кини «Drivee» саҥаны олоххо киллэриигэ салаатын инженера.
Кини үҥкүүлүү сылдьан саҥа идэни баһылыан, кэскиллээх, түргэнник сайда турар улахан хампаанньаҕа үлэлиэн баҕарара. Ол иһин айтины талан, куйаар ситимин көрөн бырагыраама оҥорорго үөрэммитэ, манна хас да хайысха баарыттан фронтенд талан ылбыта. Үлэтин түмүгүн тута браузерга көрөн олус үөрбүтэ. Үөрэнэ сылдьан элбэх киһини кытта билсэн, тугу эмит сатаабатахтарына бэйэ-бэйэлэригэр көмөлөһөн, сүбэ-ама буолаллара. Саҥаны саҕалыыр, бастакы хардыыларын оҥорор киһиэхэ доҕор көмөтө, өйөбүлэ тохтоон хаалбакка инниҥ диэки күрдьэн иһэргэр күүһү-уоҕу эбэр.
Ити курдук кини бырагыраама суруйарга биир сыл тухары күн аайы 5-6 чаас үөрэнэн баран «НН.ru» саайтка үлэ көрдөөн резюмеларын ыыппыта эрээри, улахан хампаанньалар уопуттаах үлэһиккэ наадыйаллара, ол иһин туһа тахсыбатаҕа. «Ykt.ru» биллэриилэригэр үлэ миэстэтэ федеральнай саайтан, биллэн турар, аҕыйах эрээри, резюме ыыттаххына тута эрийэллэр. Уйгууна икки тэрилтэҕэ үлэ биэрээччини кытта кэпсэппитэ, онтон бастакы үлэтин «Фнтастик» аан дойдуга аатырбыт көмпүүтэр оонньууларын оҥорор хампаанньаҕа контент-разработчигынан саҕалаабыта.
Мобильнай ооньуулары оҥорорго бастакы уопутун манна холонон көрбүтэ. Салгыы «Учур» хампаанньаҕа, куйаар ситимигэр үлэлиир маҕаһыыҥҥа үлэлээбитэ, билигин «Drivee» хампаанньаҕа үүнэн-сайдан иһэр буолан, үлэтин олус сөбүлүүр.
Кини саайт сирэйэ, тутула, истиилэ, өҥө-дьүһүнэ, функционала, интерактива хайдах оҥоһулларын, фронтенд уонна бэкенд туох уратылааҕын, сиэрбэр үлэтин туһунан кэпсээтэ.
Атын идэттэн айти-салаатыгар кэлэр дьоҥҥо Уйгууна сыыһаны-халтыны оҥордоххутуна, баҕар сатаабатаххытына быраҕан кэбиһимэҥ, киһи тугу барытын билбэт, онон билбэккитин сөпкө көрдөөн булуохха наада диэн сүбэлээтэ. Илиитин араарбакка дьарыктанар, иннин диэки баран иһэр киһи син биир сатыырын туһунан эттэ. Үлэтин таһынан кини хакатоннарга, нетворкиҥҥа кыттар, хамаанданан үлэлиир.
«Түөрүйэни, өйдөөх кинигэни аһары элбэҕи ааҕар наадата суох, быраактыкаҕа киирэн, төһөнөн элбэх бырагырааманы, куоду суруйаҕыт, оччонон сатабылгыт аһыллар. Элбэх бытархай бырайыагы оҥоруох оннугар аҕыйаҕы, ол эрэн суолталааҕы ылсар ордук көдьүүстээх.
Резюмеҕытын ким даҕаны көрбөт түгэнигэр фриланска киирэн, кэммиэрчэскэй сакаастары ылыаххытын, хаһы даҕаны оҥорон, уопутуруоххутун сөп. Киһи үйэтин тухары биир идэҕэ олоруохтаах диэн буолбатах, саҥаны саҕалыыртан куттанымаҥ. Мин билигин бэйэм миэстэбин буллум дии саныыбын, үлэбин астына-дуоһуйа оҥоробун», — диэн санаатын үллэһиннэ.
Ааптар хаартыскаҕа түһэриитэ.
-
0
-
0
-
0
-
0
-
0
-
0
