«DriveeCon» бастакы ИТ-кэмпириэнсийэҕэ «Криолит геймс» ХЭТ толорооччу дириэктэрэ, Айти-паарка дириэктэрин солбуйааччы Валерий Крупенков ньиэп-гаас салаатыгар үлэлии сылдьан баран хайдах айтига кэлбитин туһунан кэпсээтэ. Кини электроннай кэммиэрсийэ туһунан Евгений Бажов кинигэтин ааҕан баран олоҕун, идэтин тосту уларытарга санаммытын, бэл акселераторга кыттарын туһунан түүлү түһээбитин, сарсыныгар тустаах саайты булан, сайаапкатын ыыппытын эттэ.
Үс ый тухары бырайыагын бэлэмнээбит уонна презентациятын «Б8» ыыппыт. Күрэҕи ааһан, хамаанда тэринэн, мобильнай сыһыарыыны оҥорон таһаарбыттар. Акселератор тэрээһинигэр Арсен Томскайы кытта билсибит уонна сүрэҕэ тардыһар сиригэр чопчу кэлбитин дьэҥкэтик өйдөөбүт.
Спикердэр бу салааҕа ханнык идэлэр баалларын, кинилэр тугунан дьарыктаналларын, дьон үлэтин чэпчэтэр, олоҕун тупсарар, чуҥкуйдаххына аралдьытар саҥа технологияны хайдах толкуйдаан таһаарбыттарын, маркетинын оҥорбуттарын туһунан иһитиннэрдилэр.
Араас саайтары, сыһыарыылары оҥоруу санаатахха эрэ уустугун, ис дьиҥэр, илиигин ууран, сүрэххин арыйан туран үлэлээтэххинэ олоҕуҥ хаачыстыбата, тулалыыр дьонуҥ уларыйан, аан дойду аһыллан, саҥа кыах кэлэрин бэйэлэрин холобурдарынан сэһэргээтилэр.
Ааптар хаартыскаҕа түһэриитэ.
-
0
-
0
-
0
-
0
-
0
-
0
