- Дьокуускай Сибиир, Уһук Илин биир кырдьаҕас куората устуоруйаҕа суолтатын ситэ сыаналыы иликпит. 17 үйэҕэ Дьокуускай Арассыыйаҕа сүрүн тирэх буолар форпост быһыытынан биллэрэ, мантан саҕалаан Уһук Илин куораттарын, Сахалины дойдуга холбообуттара, Витус Беринг Камчатканы, нуучча Америкатын арыйбыта. Тапталлаах куораппыт 400-сылыгар, бастатан туран, куораппыт дойду устуоруйатыгар сүҥкэн оруолун бэлиэтиэх тустаахпыт.
Эспэдииссийэлэр Дьокуускайтан ыраах айаҥҥа туруналлара, ол түмүгэр Арассыыйа судаарыстыбатын сирэ-уота үс төгүл кэҥээн биэрбитэ. Азияҕа, Чуумпу байҕал кытылыгар тахсар кыахтаммыппыт. Онон Арассыыйаны бөҕөргөтөргө, сирин-уотун хаҥатарга куораппыт федеральнай таһымҥа улахан оруоллаах.
Ол иһин дойду Бэрэсидьиэнэ Владимир Путин былырыын муус устар 1 күнүгэр 2032 с. Дьокуускай 400-сыллаах үбүлүөйүн үрдүк таһымҥа бэлиэтииргэ ыйааҕы таһаарбыта. Ону толорорго куорат дьаһалтатыгар тэрийэр кэмитиэт үлэлиир, ааспыт нэдиэлэҕэ бэлэмнэнэр үлэни саҕалыырга мунньах ыытыллыбыта.
Дьоһун үбүлүөйү бэлиэтээһин дьаһалта эппитинэн эрэ барбакка, бары куорат олохтоохторо уопсай былааны оҥорууга кыттыахтарын, интэриэһинэй, баҕар соһуччу идиэйэлэрин, этиилэрин киллэриэхтэрин баҕарабыт. Уопсайынан үбүлүөй куорат олохтоохторун уопсай бырааһынньыга буолуохтаах.
Өлүөнэ эбэ кытылыгар бастакы остуруокка тирэҕирэн, Чукотка, Камчатка, Курил арыылара, Сахалин, Аляска арыллыбыт оруолун устуоруйаҕа үйэтитэргэ, куораппытын туппут дьон аатын кэнэҕэс көлүөнэҕэ хаалларарга тустаах үлэ ыытыллыахтаах.
Хаартыска эрэдээксийэ, Евдокия Евсикова архыыбыттан.
-
0
-
0
-
0
-
0
-
0
-
0
